DILI, STLTIMORLESTE.com – Pesoal nain 33 neebe halao formasaun iha Sentru Formasaun Juridiku simu pose, hanesan Notariu no Konservador iha Diresaun Ministeriu Justisa.
“Iha okaziaun ida nee realiza serimonia tomada da pose ba pesoal sira hamutuk 33 ho estatutu nuudar observador Notariadu nain 7 no Konservador nain 26, hafoin kompleta ba etapa hirak nee hahu kedan husi formasaun iha Sentru Formasaun Juridika, estajiu pratika no ikus mai admite ba kareira ida nee,” dehan Komisariu Komisaun Funsaun Publiku, Agapito da Conseição ba jornalista sira iha Salaun MJ, Kinta (19/12/2024).
Nia hatutan, iha ambitu administrasaun publika pose konstitui aktu ida neebe ofisial solene no publiku, no permite pesoal nomeadu sira manifesta aseitasaun hodi sai titular ba direitu, sujieru bad ever responsabilidade funsional ligadu ho estatutu Konservador no Notariadu.
Nunee aktu juramentu neebe emposadu sira halao ona, ida neebe sumariza ba finalidade esensial rua, ida kumpri konstituisaun, lei no regulamentu sira, no hatudu nafatin legalidade ba Estadu, hodi servi Estadu ho dedikasaun responsabilidade. Rua halao knaar ho onestu, profisional konfidensial ho koresaun hodi defende interese Estadu nian.
Tanba konteudu esensial husi juramentu refere atu bele konklui rekursu umanu kapasitadu akademiku profisionalmente konstitui nesesidade fundamental, laos ho deit komponente hirak nee, maibe iha nesesidade aposta ba abilidade esensial sira. Liu-liu atu harii no hametin prinsipiu valor vertude esensia sira mak sai baze, atu ema ida bele halao funsaun ho lealidade, honestidade, seriedade no livre husi pratika irregularidade sira hodi bele halao funsaun ba deit objetivu estadu nian.
Iha fatin ketak, Ministru Justisa Sergio Hornai agradese ba familia sira neebe permite ona sira nia oan, hodi bele tuir kursu ida nee too remata.
“Fulan nee tempu ida neebe naruk ita boot sira permite ka adimite ita boot sira nia oan, ita boot sira nia feto foun mane foun hodi bele tuir kursu ida nee iha faze tolu neebe importante,” dehan nia.
(ter)
