DILI, STLTIMORLESTE.com – Pesoal Saude sira husi Servisu Saude Munisípiu Dili (SSMD) hamutuk Mediku FALINTIL – Forsa Defeza Timor Leste (F-FDTL) halao atividade teste raan ba membru F-FDTL sira, atu nunee hatene sira nia moras.
Diretor Diresaun Saude Militár, Koronel Guido Oliveira hatete, sira halo teste bá membru F-FDTL husi Komponente Área no Kuartel Jenerál, atividades atu halo teste ba raan hodi atede sira nia saude.
Nia dehan, hodi Komando F-FDTL nia naran hatoo agradese ba kooperasaun servisu hamutuk hodi halo teste oinsá ita bele deteta moras ne’ebé mak iha.
“Husu ita boot sira nia partisipasaun ba ezarminasaun ida nee bele fo resultadu diak ba ita boot sira, depois teste ida nee idak-idak sei iha nia dadus, nune’e karik médiku deteta moras ruma sei fo solusaun, labele hakfodak ba moras nee, se hetan moras ruma ita boot sira husu obrigadu tanba deteta sedu, ho nunee bele trata itu boot nia saude, hodi nunee labele sente ameasa ba vida,” hatete Koronel Guido Oliveira liu husi nia diskursu iha Kuartel Jeneral F-FDTL Fatuhada, Dili, Kuarta (26/02/2025).
Nia tenik, iha teste sira mak hanesan tuberkolójia, HIV, sifílis, dengue, raan midar, kolestrol, hirak nee hotu dala ruma la fo sinais, se la fo sinais nee presiza teste para bele fo rezultadu mai sira, hodi nunee bele halo tratamentu sedu ba idak-idak nia aan.
“Teste ida nee laos ba tinan ida nee deit, ita sei kontinua halo tinan-tinan, servisu ida nee sai ita nia programa permanente,” nia esplika.
Iha fatin hanesan, Diretor Servisu Saude Munisípiu Dili (SSMD), Mateus Pinto sente orgulhu boot, tanba Diresaun Saude Militar bele simu pedidu hodi servisu hamutuk neebe diak tebes no laos ba nee deit maibe sei kontinua servisu hamutuk nafatin.
“Ita nia hakarak mak Forsa Nasaun ida nian bele iha kondisaun neebe diak, bele iha kondisaun neebe masimu para oinsa bele asegura nasaun no povu Timor, nee importante, se lae ita la halo Teste (Check-Up) too tempu ruma moras naba-naban, nasaun seluk bele dehan forsa ne’e halo deit saida mak moras naba-naban deit nee, ida nee labele akontese iha F-FDTL,” nia deklara.
(jen)
