DÍLI, STLTIMORLESTE.com – Desizaun Governu nian hodi fo subsidiu ho valor milhaun US$ 186 ba Kompanhia Esperansa Timor Oan (ETO) laos deit hamosu polemika diskusaun neebe naruk iha sosiadade nia leet, maibe mos hetan kritika makaas husi Partidu Libertasaun Popular (PLP). PLP kestiona fundamentu lojika no kbiit etika husi desizaun nee, liu liu tanba parte kompanhia deklara ona katak, sira nia stok kombustivel sei sufsiente too fulan Abril.
Tuir Visi Prezidente PLP ba Assentu Orgaun Asosiadu no Movimentu, Amilcar dos Reis Araújo “Hatenu” katak, osan ho milhaun nee boot tebes no lo-loos tenke foti bazeia ba urjensia nasional neebe prioridade ka lo-loos laos inventadu.
“Se kompanhia deklara ona katak mina sei sufsiente, entaun argumentu krize neebe Governu uza nee laiha baze lojika. Nee bele intrepreta hanesan tentativa ida uza osan Estadu nian ba interese neebe laos urjente,” dehan Amílcar ba jornalista STL iha nia rezidensia Manleuana, Díli, Tersa (07/04/2026).
Amilcar mos sublina katak iha siensias ekonomika, subsidiu tenke fo impaktu diretu ba povu, laos deit ba kompanhia, se folin kombustivel iha bomba ka fatin sira nee nafatin karun, entaun osan milhaun US$ 186 nee lá ajuda povu nia moris loron-loron.
Visi Prezidente Partidu Libertasaun Popular (PLP) ba Assentu Orgaun Asosiadu no Movimentu nee kestiona mos kona-ba transperensia iha prosesu atribuisaun fundu nee.
“Tanba sa Governu fo deit ba ETO, nusa la uza osan nee hodi dezenvolve setor produtiva hanesan agrikultura, turizmu no seluk tan,” Amilcar kestiona.
Ba Amilcar desizsun nee kria presedente neebe la diak ba futuru governasaun nian. Se Governu bele fo osan boot ba kompanhia neebe la presiza urjente, ida nee bele loke odamatan ba pratika nepotizmu ka monopoli neebe hamate kompetisaun saudavel iha merkadu Timor Leste (TL).
Iha parte ketak Observador Ekonomia, Pedro da Silva hatete, bainhira Governu fo deit privleiju ba kompanhia boot ida, nee hamonu fali moral negosiante kiik sira.
Enkuantu ETO simu milhaun ba milhaun, vendador sira iha merkadu tenke luta loron-loron ho impostu no folin sasan neebe sae, maibe la simu direitu husi Governu.
Too notisias nee STL publika, parte ETO no mos Ministeriu relevante seidauk fo komentariu hodi responde ba kestionamentu ida nee, maibe antes nee Governu afirma ona katak, nee pasu seguransa nasional nian.
(car)
