DILI, STLTIMORLESTE.com – Primeiru Ministru (PM), Kay Rala Xanana Gusmão relata servisu Governu nian ba Prezidente Republika (PR), Jose Ramos Horta, iha Palasiu Prezidensial, Nicolau Lobato.
Bainhira remata hasoru malu, Primeiru Ministru Kay Rala Xanana Gusmão ba jornalista sira iha Palasiu Prezidensial Nicolau Lobato, Bairo Pite, Kinta nee (13/03/2025) hatete, hasoru Prezidente Republika kada semana-semana, halo enkontru semanal hodi relata servisu Governu nian ba Xefe Estadu.
“Nee enkontru semana-semana neebe la koalia buat barak, hau informa deit ba Prezidente Republika katak iha preparasaun daudaun ona husi Ministeiru hotu husi Governu atu simu bainaka ida neebe sei mai, laos deit atividade G7+ nian, maibe atividade CPLP joga nia, no simu Primeiru Ministru Malazia, Primeiru Ministru Vietnam, ami prepara daudaun ona,” katak PM, Xanana.
Primeiru Ministru dehan, iha enkontru nee relata mos kona-ba Parlamentu Nasional neebe diskuti hela lei orsamentu neebe troka tiha lei neebe estraga lei jestaun.
“Informa mos ba Prezidente Republika katak, iha Parlamentu diskute hela lei ba orsamentu neebe troka tiha lei ida neebe estraga tiha ita nia lei jestaun ba osan husi fundu petroliu, buat sira nee hotu nomos informa ba Prezidente, Diretor Nasional, Doutor Jeral ida husi Ministeriu Negosiu Estrajeiru Espanha nian husi Madrid mai kedas iha nee hodi fo hanoin katak, sira mos hakarak partisipa iha prosesu projetu tasi mane neebe oras-oras tan hasoru malu ho Ministru Petroliu nia,” katak nia.
Xefe Governu dehan, informa mos ba Prezidente Republika katak, Governu iha tinan kotuk neeba foin daudaun nee aprova tiha ona autoriza Ministeriu Petroliu atu loke tender ba Suia Suplay Base ho lote 3 ba iha husi estrada Suai nia ba Betano no Natarbora.
Iha hasoru malu nee koalia mos kona-ba situasaun iha Portugal, nomos koalia oituan kona-ba funu iha Ukrania.
“Hau mos dehan ba Prezidente Republika katak, ita hakarak Ordenamentu ou Planeamentu Urbanu, ita nia kapital sai hanesan fali aldeia ida, nee mak informa ba Prezidente, tanba ema balu sei protesta oin-oin atu hahu daudaun ona atu halo estrada Kuluhun nia husi parte liman karuk nia, neebe karreta sira liu nafatin ho mos parte eskerda ponte mos kiik loos ona,” katak nia.
Primeiru Ministru dehan, iha ordenamentu ema balu lamenta tanba uma hetan eviksaun, tanba veteranus, maibe objetivu atu dezenvolve rai nee laos dezenvolve idak-idak nia aan.
“Ita funu atu dezenvolve rai laos funu atu dezenvolve idak-idak nia aan nee ga lae”, nomos informa ba Prezidente katak, atan oan hau hanoin la udan mais foin lalais Sabadu udan, familia afeita iha Komoro, iha mota Komoro nia sorin ba, hau ba iha neeba hau la haree imi,” katak PM, Xanana.
(eme)
