DILI, STLTIMORLESTE.com – Primeiru Ministru (PM), Kay Rala Xanana Gusmão apresia Parlamentu Nasional (PN), tanba aprova pedidu husi Governu kona-ba pedidu proposta Orsamentu Retifikativu ho urjensia.
Primeiru Ministru, Kay Rala Xanana Gusmao hatoo lia hirak nee ba jornalista sira, bainhira remata halo enkontru semanal ho Prezidente Republika Jose Ramos Horta iha Palasiu Prezidensial Nicolau Lobato, Bairo Pite, Kinta (21/05/2026).
Iha biban nee Primeiru Ministru apresia Parlamentu Nasional tanba bele aprova ona pedidu urjensia ba debate proposta lei orsamentu retifikativu ho montante millaun US$ 192 ho votus afavor 41 kontra 0 no abstensaun 22.
“Agora ita komu okupadu hela ho orsamentu retifikativu iha parlamentu ita husu ho urjensia neebe ami apresia tebes ba parlamentu hatan ita nia pedidu urjensia nee,” katak Xanana.
Primeiru Ministru hatete, husu urjensia tanba atu impede iha instituisaun estadu nia neebe hasai osan oituan atu tau iha neeba hodi bele garante fornesementu mina hodi bele garante katak iha tempu naruk bele mosu ho alimentasaun atu sosa.
“Agradese tebes ba parlamentu agora membru Governu balun responde hela iha neeba karik hau imforma ba Prezidente karik iha 2 junio bele sai ona se antes diak liu tan mais se 2 junio mos bele tanba agora 21 ona depois ba too 2 junio,” dehan PM Xanana.
Iha biban nee, Primeiru Ministru hatete dadaun nee Preziente Republika Jose Ramos Horta mos apresia ho serbisu buat oin oin.
“Prezidente mos preokupa haree ba ida nee haree ba produsaun haree ba sira interior, imi hotu hatene iha Viqueque iha lospalos mos, iha Suai udan boot estraga buat barak maibe selebrasaun buat hotu lao kapaas laiha buat ida neebe akontese,” katak PM.
Foin lalais Governu submete proposta Orsamentu Retifikativu ba Parlamentu Nasional iha loron 15 fulan-maiu tinan 2026, entrega ba Prezidente Parlamentu Nasional, Maria Fernanda Lay, proposta alterasaun dahuluk Lei n. 8/2025, loron 27 fulan-novembru, konaba Orsamentu Jeral Estadu ba tinan 2026 (OJE 2026).
Orsamentu retifikativu, aprova husi Konsellu Ministrus iha sorumutu loron 13 fulan-maiu liuba, prevee ajustamentu ida ba OJE 2026 hodi hatan ba aumentu hosi folin kombustivel internasional, relasiona ho konflitu iha Mediu Oriente.
Ho proposta nee iha loron 19 fulan maiu parlamentu nasional aprova ona pedidu urjensia ba debate proposta lei orsamentu retifikativu ho montante millaun $192 ho votus afavor 41 kontra 0 no abstensaun 22.
(eme)
