DÍLI, STLTIMORLESTE.com – Primeiru-Ministru (PM), Kay Rala Xanana Gusmão hatete, Governu Timor-Leste (TL) haksolok no hakarak felesita ekipa legál sira ne’ebé durante ne’e esforsu hodi TL hetan vitória husi desizaun Tribunál Supremu Estadu Vitória Austráliaba husi kompanhia Lighthouse Corporation hasoru TL.
Sentimentu skolok nee hatoo husi PM, Kay Rala Xanana Gusmão, liu husi konfrensia imprensa neebe halao iha salaun VIP Aeroportu Internasional Prezidente Nicolau Lobato Dili, hafoin fila husi Jarkarta-Indonézia, akompanha meza deronde da-4 kona ba fronteira Maritima TL-Indonezia
Nia dehan, Governu TL kontente tebes ho dezisaun Tribunál Supremu Estadu Vitória Austrália, tanba problema kompanhia Lighthouse ho Governu Timor-Leste desde tinan 2010, kompanhia Lighthouse Corporation, momentu ne’ebá haktuir sira iha vontade no koopera ho Governu Timor-Leste atu fornsese jeradores ualu nomós fornese kombustivél durante tinan hitu ba Governtu TL, maibé ikus mai kompanhia Lighthouse Corporation entrega de’it jeradores rua no ejizi Governu TL tenke selu fali ho presu ne’ebé boot.
“Kompanhia Lighthouse Corporation sira ejizi loos dehan ita, atu selu kompensasaun ba sira tanba sira lakon entre millaun US$ 500 ate millaun US$ 600, tanba ita asina tiha ona kontratu mina sira ne’e, ami la ba lori mai ne’e mak ami lakon ne’e, ita atu hamnasa tiha de’it,” dehan PM Xanana ho oin midar.
Nia haktuir tan katak, iha tinan hirak liubá, kompanhia Lighthouse Corporation lori kazu ne’e ba tribunál arbitrajen internasionál, hodi keixa Governu Timor-Leste no lori prosesu tinan naruk nune’e , foin lalais mak Tribunál Supremu Estadu Vitória Austrália deklara katak rejeita prosesu ho valor milhaun US$ 600 husi kompanhia Lighthouse hasoru Timor-Leste. Lighthouse la kumpre orden tribunál atu selu US$ 1,3 millaun nu’udár garantia ba kustu prosesu antes kazu ne’e tama iha julgamentu.
“Foin daudaun ne’e mak Tribunál iha Vitoria Australia dehan lae ona, ne’ebé ita atu temi karik dehan nia lakon tiha ona kazu ida-ne’e, ita bele hanoin komú nia lakon dalabarak ona sempre rekore halo rekursu, dalaruma nia halo recursu maibé depende ba Tribunál dehan labele tanba laiha provás, ne’ebé ita kontente,” afirma PM Xanana.
PM Xanana felesita tebes ho ekipa legál ne’ebé servisu maka’as tebes, felesita mós ba juíz sira ne’ebé hola parte iha prosesu no desizaun sira ne’e, tanba bele konsidera lia loloos.
“Ita kontente tanba ida-ne’e, ita kontente tanba justisa bele halo, ita garantia katak justisa iha no funsiona,” Xefe Governu konklui.
Nia lembra, uluk povu hakilar ukun aan tanba defende lialoos, agora apresia ba tribunal tanba sempre defende lia loos.
(jos)
