DILI, STLTIMORLESTE.com – Primeiru Ministru (PM), Kay Rala Xanana Gusmão hatete, nia la konkorda atu debate proposta lei defamasaun, diak liu tribunal haree kazu seluk neebe seidauk rezolve, duke ba haree fali buat kiik konaba defamasaun nee.
Primeiru Ministru Kay Rala Xanana Gusmão hatoo kestaun nee ba jornalista sira, bainhira remata halo enkontru semanal ho Prezidente Republika Jose Ramos Horta iha Palasiu Prezidensial Nicolau Lobato, Bairo Pite, Kinta (16/07/2026).
“Hau ladun konkorda ho lei defamasaun, tanba mosu ho imi nia media sosial sai problema boot liu fali agora, agora temi deit lalika maibe provoka ho imi nia media sosial sira falsu sira nee ita mak invez de tribunal ba haree kazu neebe rihun ba rihun seidauk rejolve tan ba haree fali buat kiik ida tolok malu,” dehan Primeiru Ministru.
Primeiru Ministru hatutan tan katak, la konkorda atu halo debate konaba lei defamasaun, tanba iha Parlamentu Nasional koalia barak ona maibe tanba hirus malu no tolok malu lori malu ba tribunal nusa tribunal laharee ba kazu seluk.
“Hau la konkorda tanba defamasaun nee ita nee insulta oinsa, defema too iha neebe, ita rona iha Parlamentu koalia barak mais buat nee iha sosiedade laran nee imi kala defama malu hirus malu nee mak tau Tribunal,” katak PM Xanana.
Maibe antes nee Prezidente Republika husu Primeiru Ministru para fo orientasaun ba Bankada CNRT no PD atu dada fila lei defamasaun nee oinsa Primeiru Ministru nia haree ba ida nee? hatan ba kestaun nee Primeiru Ministru hatete ba husu bankada CNRT ba husu fali PM Xanana halo saida. “Ba husu Bankada CNRT, hau nee bankada Governu,” dehan PM Xanana.
Antes nee Prezidente Republika (PR), Jose Ramos Horta hatete, nia sei koalia ho Primeiru Ministru (PM) Kay Rala Xanana Gusmão atu retira proposta lei defamasaun.
PR Horta husu PM atu fo intrusaun ba deputadu sira husi Bankada CNRT no PD nunee bele hasai tiha projetu lei neebe parlamentu rasik halo ona ajendamentu atu deskute nee.
Prezidente Republika hatete, diak liu Governu no Parlamentu Nasional foka assuntu seluk liu liu konaba dezenvolvimentu ba ekonomia no seluk tan lalika preokupa ho lei defamasaun.
“Hau totalmente kontra lei defamasaun kinta feira mai hau sei koalia Primeiru Ministru Kay Rala Xanana Gusmão para PM fo instrusaun ba bankada CNRT, PD, hasai tiha projetu lei ba defemasaun nee ida ikus liu nee 2014 hasai hotu, liu liu konsentra ba buat neebe presiza ba ekonomia ba dezenvolvimentu rai nee, nee mak hau kontra,” dehan PR Horta.
Antes nee mos Prezidente Republika hatete ona, se bainhira Parlamentu Nasional obriga aan aproga lori ba Prezidente Republika sei la promulga.
(eme)
