DILI, STLTIMORLESTE.com – Iha loron Kinta (16/07/2026) loraik, Primeiru Ministru (PM), Kay Rala Xanana Gusmão, lidera reuniaun interministerial hodi halo koordenasaun ba da 4 konaba Timor Leste (TL) nia partisipasaun enkontru iha Association Of Southeast Asian Nation (ASEAN) no reuniaun ACNOC ba da 3, iha Ministeriu Negosiu Estranjeiru no Kooperasaun (MNEK), Praia dos Coqueiros, Pante Kelapa, Dili.
Reuniaun nee realiza atu asegura preparasaun no koordenasaun entre ministeriu no instituisaun relevante sira hodi hasae prontidaun TL ba partisipa iha enkontru importante sira iha ASEAN no mekanizmu sira neebe liga ho organizasaun rejional nee.
Iha enkontru nee, PM Kay Rala Xanana Gusmau enfatiza importansia servisu hamutuk entre entidade governamental sira, hodi garante tL bele partisipa ho preparasaun diak, atu reprezenta interese nasional no kontribui ativamente iha prosesu integrasaun rejional.
“Ohin Ami koalia deit kona ba progresu preparasaun, tanba TL sei asume Prezidensia ASEAN iha tinan 2029. Ministru Negosiu Estranjeiru no Visi Ministra Asuntu ASEAN hatoo katak, preparasaun barak ona lao diak no estabelese ona prazu, atu kompleta too fulan Dezembru. Ami mos koalia kona ba aprezentasaun planu ida, atu responde ba atividade sira neebe sei halao too tinan 2029,” dehan PM Kay Rala Xanana Gusmão.
Nia dehan, reuniaun preparasaun sira nee, sei lidera husi Visi Ministra Asuntu ASEAN, Milena Rangel, hodi asegura tL prepara aan ho diak, atu bele asume Prezidensia ASEAN iha 2029.
Iha biban nee, PM Xanana bolu atensaun ba ministeriu hotu-hotu, atu kontinua halo koordenasaun ho nasaun membru ASEAN sira, liu-liu iha implementasaun akordu no kooperasaun iha area ida-idak, atu integrasaun tL iha ASEAN bele fo benefisiu ba nasaun.
Iha reuniaun nee mos, avalia progresu preparasaun iha area oi-oin, inklui aspetu tekniku, koordenasaun politika no lojistika, atu asegura tL nia prontu ba kumpri kompromisu no atividade sira iha kuadru ASEAN.
Governu TL kontinua demonstra nia kompromisu, atu hametin preparasaun nasional no reforsa koordenasaun interministerial, hodi apoia prosesu integrasaun TL ba ASEAN no aumenta benefisiu ba povu no dezenvolvimentu nasaun.
(jos)
