PM Xanana Partisipa Iha Enkontru Lidera ASEAN

Primeiru Ministru Kay Rala Xanana Gusmão partisipa iha enkontru líder ASEAN kona-bá Vizaun Komunidade ASEAN 2045. (Foto: STL/Jeniche da Costa)

MANILA, STLTIMORLESTE.com – Primeiru Ministru Timor-Leste, Kay Rala Xanana Gusmão, no Prezidente Parlamentu Nasionál, Maria Fernanda Lay, partisipa iha enkontru líder ASEAN kona-bá Vizaun Komunidade ASEAN 2045.

Iha inkontru ne’e diskute papél parlamentu sira atu hametin kooperasaun rejionál no asegura implementasaun Vizaun Komunidade ASEAN 2045.

Timor-Leste marka prezensa iha enkontru ne’e ho reprezentasaun governu no parlamentu, hamutuk ho líder no reprezentante nasaun membru ASEAN seluk.

Tuir Prezidente Filipinas, Ferdinand R. Marcos Jr., subliña responsabilidade parlamentu sira atu promove partisipasaun feto no juventude.

Nia mós enfatiza importánsia kooperasaun iha kombate droga, krime transnasionál no ameasa emerjente sira, hodi hametin sentralidade ASEAN

“Ita husu parlamentu sira atu aprofunda relasaun ho parseiru no komunidade, hodi asegura kooperasaun rejionál reflete aspirasaun povu nian,”hatete Prezidente Filipinas, Ferdinand R. Marcos Jr liu husi nia deskurus iha Philippines International Convention Center (PICCC) Manila-Filipina (16/11/2026).

Nia esplika katak tema Prezidénsia ASEAN 2026, “Navigating Our Future Together”, orienta nasaun membru sira atu enfrenta dezafiu jeopolítiku, mudansa komérsiu no transformasaun teknolojia.

“Kompromisu ne’ebé foti iha nível ASEAN presiza implementa liuhosi instituisaun nasionál, lejislasaun, orsamentu no fiskalizasaun,” nia afirma.

Relasiona ho Vizaun Komunidade ASEAN 2045, Marcos alerta kona-bá dezafiu seguransa enerjia, seguransa ai-han, intelijénsia artifisiál, fraúde online no krime transnasionál.

Dezafiu seluk mak mudansa klimátika, dezastre naturál, protesaun traballadór migrante no mudansa demográfika.

Nia afirma katak governu no parlamentu presiza servisu hamutuk liuhosi polítika, lejislasaun, alokasaun rekursu no diálogu kontinuu ho povu.

Iha parte ikus, Prezidente Marcos hato’o apresiasaun ba oportunidade atu rona mensajen hosi parlamentu ASEAN no hametin kooperasaun entre governu no parlamentu.

Entertatu PM Xanana Gusmão no Prezidente Parlamentu Nasionál, Maria Fernanda Lay, kontinua partisipa iha sesaun taka ba públiku (closed session), hafoin sesaun enkontru ho líder ASEAN sira.

(jen)

Share it :

Leave a Reply

Your email address will not be published. Required fields are marked *