DILI, STLTIMORLESTE.com – Primeiru Ministru (PM), Kay Rala Xanana Gusmão sente lakon Ministru Ensinu Superior, Siensia no Kultura (MESSK), José Honório da Costa Pereira Jerónimo, neebe servisu ho dedikasaun tomak iha IX Governu Konstitusional.
Primeiru Ministru espresa sentimentu triste nee liu husi mensajen eskrita, bainhira vizita mate isin José Honório da Costa Pereira Jerónimo iha mortuariu Hospital Nasional Guido Valadares, Dili, Tersa (21/04/2026).
“Prezensa Xefe Governu nian nee mos hodi hatoo sentidu kondolensia no enkoraza familia atu forsa perante situasaun triste nee,” haktuir nota komunikadu imprensa neebe STL asesu husi media Gabinete Primeiru Ministru.
José Honório da Costa Pereira Jerónimo moris iha Bazartete, Munisipiu Likisa, iha 15 fulan Fevereiru 1973.
Tinan 2001, gradua iha Estudu Dezenvolvimentu husi Institutu Teknolojia no Siensia Mandala Indonezia.
Hetan titulu Mestradu kona-ba Estudu Dezenvolvimentu iha Universidade Kristen Satya Wacana, Salatiga, Indonezia, iha 2010.
Tinan 2001 nuudar dosente iha Fakuldade Ekonomia, Departamentu Estudu Ekonomia no Dezenvolvimentu iha Universidade Nasional Timor-Leste (UNTL).
Assume kargu xefia oin-oin iha UNTL mak hanesan, Xefe Departamentu Ekonomia no Estudu Dezenvolvimentu (2004-2006), Dekanu Fakuldade Ekonomia (2006-2008), Vise-Dekanu Asuntu Estudante iha Fakuldade Ekonomia no Jestaun (2011-2013), Reitor Administrasaun no Finansas (2016-2020) no Pro-Reitor Inspesaun, Auditoria no Kontrolu Kualidade (2021-2023).
Nuudar membru Konsellu Jeral UNTL husi 2015 too 2016. Halao knaar nuudar Adidu Komersiu iha Embaixada Republika Demokrátika Timor Leste iha Jakarta, Indonézia (2013-2015).
Iha tinan 1994, sai hanesan membru organizasaun estudante Rezisténsia Nasional Estudante Timor Leste (RENETIL) neebe harii iha tinan 1988 hosi estudante timoroan sira iha Indonezia ho objetivu atu luta ba independensia Timor-Leste nian.
Iha loron 1 fulan Julhu tinan 2023, simu pose nuudar Ministru Ensinu Superior, Siensia no Kultura iha IX Governu Konstitusional, hodi sai responsavel ba konsesaun, ezekusaun, koordenasaun no avaliasaun politika nian iha area sira ensinu superior no kualifikasaun nian, no mos area Siensia no teknolojia. Universidade Nasional Timor Leste, Institutu Politékniku Betano, Institutu Nasional Siensia no Teknolojia, no Ajensia Nasional ba Avaliasaun no Akreditasaun Akademika, I.P, iha ninia autoridade nia okos.
(alb)
