DILI, STLTIMORLESTE.com – Prezidente Parlamentu Nasional (PPN), Maria Fernanda Lay deklara, Parlamentu Nasional sei halo diskusaun ba proposta lei Siberseguransa iha fulan Setembru 2026.
PPN Maria Fernanda Lay hatete, lei siberseguransa nee governu mak husu Parlamentu Nasional atu halo autorizasaun, tan nia parte sei haree didiak proposta lei nee molok baisa ba komisaun A hodi diskute.
Tuir nia, oras nee Parlamentu Nasional sei resesu hela too loron 15 Setembru, maibe hafoin resesu sei baisa ba komisaun A hodi halo diskusaun.
“Tanba lei sibernetika nee kompetensia Parlamentu Nasional nian, mas se governu hakarak halo ya halo favor, mas sei iha prosesu nia laran. Hein ami tama fila fali iha loron 15 Setembru posivelmente foin bele,” hatete nia ba jornalista sira iha Parlamentu Nasional, Kuarta (05/08/2026).
Iha fatin hanesan, Deputada Bankada Partidu KHUNTO, Irene Gonzaga katak, nia parte seidauk bele fo komentariu kona-ba lei Siberseguransa, tanba seidauk lee dokumentu neebe Governu aprezenta ba Parlamentu Nasional.
“Hau seidauk bele koalia tanba hau seidauk haree dokumentu neebe Governu haruka mai nee nia konteudu oinsa, maibe depois hau haree mak hau sei koalia buat ruma ho imi,” katak Deputada Ireni Gonzaga.
Nunee mos Prezidente Komisaun A neebe trata asuntu Konstituisionais no Justisa iha Parlamentu Nasional (PN), Deputadu Natalino dos Santos hateten, Komisaun A sei halao estudu komparativu iha nasaun Filipina ho Tailandia, ho objetivu atu haree besik implementasaun lei Krimi Sibernetika.
“Komisaun A utiliza tempu resesu hodi halo estudu komparativu iha Tailandia no Filipina hodi haree no hatene kona-ba nasaun sira nee ninia esperiensia liu-liu implementasaun Lei Siberseguransa,” hatete Prezidente Komisaun A, Deputadu Natalino dos Santos
Nia dehan, objetivu husi estudu komparativu nee mak atu buka esperiensia sira kona ba implementasaun Lei Siberseguransa nee, molok Komisaun A ho Governu atu diskute konaba esbosu lei krimi sibernetika neebe governu sei aprezenta ba Parlamentu Nasional iha tempu besik.
“Deputadu sira ba hasoru entidade sira nee saida mak deputadu sira atu ganha esperiensia artikula iha Tailandia, nunee deputadu sira bele iha konhesimentu oituan para depois mai ita halo debate iha trata Lei nee sira iha ona referensia atu artikula iha lei nee,” dehan nia.
(alb)
