BAUCAU, STLTIMORLESTE.com – Programa Nasionál Dezenvolvimentu Suku (PNDS) tinan 2026 ne’ebé implementa iha Suku Tirilolo, Postu Administrativu Baucau, besik ona atu konklui.
Xefe Suku Tirilolo, Elvino Freitas Belo, hateten katak implementasaun PNDS tinan ida-ne’e kompostu husi konstrusaun Sentru Komunitáriu rua no reabilitasaun estrada liuhusi konstrusaun cór beton iha área ne’ebé konsidera importante ba komunidade.
Projetu estrada ne’e lokaliza iha Aldeia Lialailesu atual progresu fiziku atinji ona 65%, enkuantu konstrusaun Sentru Komunitáriu rua, ida iha Sede Suku Tirilolo no ida iha Aldeia Kaisidu, progresu fiziku atinji ona 50%.
“Estrada ne’e nia progresu 65% ona, hela oituan deit atu tama ba 100%. Konstrusaun Sentru Komunitáriu rua ne’e iha ona 50%. Agora tau ona nia kuda-kuda, hein kelen to’o sei taka ne’e hotu ona,” Elvino Belo informa ba STL iha Sede Suku Tirilolo, Kinta (03/09/2026).
Nia hateten katak implementasaun projetu sira ne’e la’o tuir planu kontaktu, tanba kontratu ba implementasaun projetu ho tempu aproximadamente fulan tolu, ne’ebé hahú servisu husi fulan Jullu 2026. To’o inísiu fulan Setembru nee, servisu besik atu remata
Elvino Belo esplika katak Konsellu Suku Tirilolo deside konstrui Sentru Komunitáriu, tanba infraestrutura refere konsidera importante ba komunidade, liuliu atu realiza sorumutu iha nivel Suku no atividade serimónial sira ne’ebé presiza fatin apropriadu no seguru.
Nia relata, Sentru Komunitáriu iha Aldeia Caisido medida 9×20 metru no ida iha Sede Suku Tirilolo medida 15×20 metru, ne’ebé konstrui ho valór orsamentu US$ 38,546.
PNDS regular seluk ba reabilita estrada eskala ki’ik ho tipu cór beton totál aproximadamente kilometru tolu iha Aldeia Lialailesu implementa ho valór orsamentu hetan US$ 32,000 atual progresu fiziku atinji ona 65%.
“Ekipa PNDS Suku, Postu ho tékniku sira kontinua akompaña oinsá mak bele aselera. Parese hela semana rua ho balun hanesan ne’e, finaliza ona,” Elvino akresenta.
Nia mós hateten katak programa adisionál PNDS ne’e atual konsidera ona nu’udar parte husi programa regular segundu ne’ebé implementa iha Suku Tirilolo.
Kona-ba posibilidade atu Suku Tirilolo hetan tan programa PNDS reguler segundu iha tinan oin, Elvino Belo hateten katak desizaun ne’e sei depende ba planu no desizaun husi Autoridade Munisípal.
Entertantu, Suku Tirilolo kompostu husi aldeia neen, mak Betulale, Kaisidu, Lutumutu, Lialailesu, Parlamentu no Ossoua ho totál populasaun 7,277 husi Xefe família 1,702.
(tom)
