PNDS Sei Investiga Projetu Estrada Rural Iha Uligata

Projetu PNDS reabilitasaun estrada rural iha Aldeia Uligata, Suku Afasa, Postu Administrativu Kelikai Antiga, Munisipiu Baukau. (Foto: STL/EST 2)

BAUKAU, STLTIMORLESTE.com – Programa Nasional Dezenvolvimentu Suku (PNDS) Delegasaun Territorial Munisipiu Baukau sei investiga projetu reabilita estrada rural iha Aldeia Uligata, Suku Afasa, Postu Administrativu Kelikai Antiga, Munisipiu Baukau.

“Kona-ba sasan sira estragus ita sei halo investigasaun, ekipa ida sei tun, tanba semana kotuk nee mak hau desloka funsionariu PNDS permanente iha Kelikai Antiga,” hatete Diretor PNDS Delegasaun Territorial Munisipiu, Amaro Gusmão Gama Fernandes ba STL iha nia knaar fatin, Kinta (30/01/2025).

Investigasaun neebe atu akontese, tanba tuir informasaun neebe iha, material kontrusaun hanesan sumenti saka balu hetan estragus, deskonfia hanesan rai deit iha udan laran no servisu reabilita estrada seidauk hotu.

Projetu estrada rural refere implementa iha Aldeia Uligata dezde tinan 2022, neebe reabilita husi area Loiba’alari too Budefu’u hamutuk metru 600 ho durasaun fulan 3, ho total orsamentu rihun US$ 28 ho tipu cor beton, maibe parte PNDS seidauk halo identifikasaun klean, tanba sei iha problema laran.

“Hau rasik hetan informasaun iha problema, hau haruka ekipa tun ba buka tuir, maibe problema nia hun asuntu privadu sira tau sala eziji hasai fasilitador tekniku,” hateten Amaro.

Fasilitador tekniku PNDS Suku Afasa, atual sai ona Koordenador PNDS Postu Administrativu Kelikai Antiga, nunee PNDS Munisipal husu ona dadus ba projetu reabilitasaun estrada refere atu aprezenta, maibe seidauk aprezenta, tanba sei hein enkontru mensal iha fulan Fevereiru tinan nee.

“Esforsu mak ami destaka ekipa foun ba cek relatoriu orsamentu, tanba osan atu fila ba kofre estadu, nee osan neebe la ezekuta projetu, nebe progresu fiziku 0,” Amaro akresenta.

Orsamentu infraestrutura kobre husi projetu tinan 2021-2023 implementa iha Baukau neebe iha loron 15 Novembru 2024 fila ona ba kofre estadu hamutuk US$ 359,174.74, la inklui ho orsamentu rihun US$ 28 neebe aloka ba Aldeia Uligata, Suku Afasa, tanba projetu fiziku lao.

Too ohin loron progresu fiziku no gastu orsamentu ba projetu refere, parte Diretor PNDS seidauk simu dadus, tanba sei hein aprezenta iha enkontru mensal, maibe garante projetu refere sei remata iha segundu trimestral tinan nee, tanba konsidera daudaun servisu lao hela iha terenu.

(EST 2)

Share it :

Leave a Reply

Your email address will not be published. Required fields are marked *