DILI, STLTIMORLESTE.com – Polísia Nasional Timor Leste (PNTL) liu husi Komandante PNTL Munisípiu Dili, Komisáriu Asistente Polísia, Orlando Gomes apela ba joven sira iha kapitál Dili atu fo liman ba malu hodi kontribui ba situasaun seguransa estavel iha kapital Dili.
“Mensajen ba publiku katak, loron besik ona ita atu komemorasaun loron restaurasaun independensia ba dala-24 iha 20 de Maiu 2026, Komando Munisipiu dili apela ba juventude sira no joven potensia sira, ita nia juventude rezistensia sira iha kapital dili, ita nia lider no lokal sira tomak no komunidade sira, Komando husu ita hotu kontribui no fo liman ba malu, apoiu malu para ita kria situasaun iha kapital Dili lao diak no susesu,” Komandante PNTL Munisípiu Dili, Komisáriu Asistente Polísia Orlando Gomes ba ba jornalista sira iha nia knaar fatin, Tersa (19/05/2026)
Nia esplika, nunee festeza loron restaurasaun independensia lao ho diak no susesu, tanba loron ida nee loron povu nian, tanba nee hotu-hotu kontribui para sutuasaun seguransa nee bele lao ho diak.
Komandante PNTL Munisípiu Dili nee iha esperansa katak, joven sira iha kapital Dili iha ona maturidade hodi servisu hamutuk ho PNTL no FALINTIL- Forsa Defeza Timor Leste (F-FDTL) bele garante situasaun seguransa ho di’ak.
“Komando Munisipiu Dili fiar katak, joven sira iha kapital Dili iha ona manturidade para servisu hamutuk ho PNTL no F-FDTL ho ita nia parseiru sira hanesan Konselhu Polisia Komunitariu sira iha Suku -Suku para ita garantia ita nia situasaun seguransa diak, para ita komemora loron restaurasaun independensia tinan ida nee lao ho diak no susesu,” afirma.
(jen)
