LAUTEM, STLTIMORLESTE.com – Komandante Polisia Munisipiu Lautem, Superintendente João da Costa hatete, hahu husi Janeiru too mai fulan Dezembru tinan 2024, Polisia Nasional Timor Leste (PNTL) iha Munisipiu Lautem, atende kazu Vilonesia Bazeia ba Jeneru (VBJ) hamutuk 42.
“Kazu neebe ita rejistu iha nee hamutuk 42 Kazu, neebe PNTL atede no rejistu depois prosesu hotu ba iha Ministeriu Publiku,” hatete Superintendente João ba STL iha Salaun Kultura Lospalos, Segunda (23/13/2024).
Nia dehan, kona-ba autor sira neebe komete kazu VBJ nee, ninia finalidade seidauk simu, maibe kazu hotu-hotu prosesu ona ba Ministeriu Publiku.
“Kazu nee nia finalidade ami seidauk hetan, tanba ida nee segredu Justisa nian, depois lori ba iha Tribunal mak bele desidi, maske rezultadu seidauk mai iha PNTL,” nia esplika.
Iha fatin ketak, Akademista UNTL, Fakuldade Direitu, Novita Dewi Vilanova esplika, esforsu barak mak governu ho parseiru sira halao ona hodi redus violensia kontra feto, maibe too agora seidauk bele redus numeru, tanba nee esforsu prevensaun primaria nee importante tebes.
“Ema komesa haree, katak violensia bazeia ba jeneru ka violensia domestika nee kazu krimi no presiza duni atendimentu maibe lei tratamentu ba kazu la too atu kura, tanba ida nee gasto boot tebes no impaktu ba familia no estadu rasik,” nia dekalra.
Nia mos husu ba Governu tenke fo prioridade hodi halo prevensaun, tanba haree ba planu nasional, kazu violensia bazeia ba jenero iha pilar importante hat, mak prevensaun, protesaun no asesu ba justisa.
“Tenke aloka orsamentu barak ba iha area protesaun, governu iha obrigasaun tau matan, nunee bele prevene liu husi halo prevensaun husi familia, oinsa promove dialogu no relasaun neebe seguru,” nia dehan.
Nia husu ba FOKUPERS servisu hamutuk ho UNFPA no PHD hodi halo edukasaun kona ba seksualidade neebe komprensivu no saude reprodutivu ba iha eskola sira, nunee bele redus kazu violensia bazeia ba jeneru iha sosiedade nia leet.
(jen)
