AINARO, STLTIMORLESTE.com – Autoridade Seguransa Polisia Nasional Timor Leste (PNTL) Munisipiu Ainaro identifika ona inan ida ho inisial AMCS, tinan 18, neebe suspeita soe nia bebe iha area Bairu Cina Uma, Aldeia Maubisse Vila, Suku Maubisse, Postu Administrativu Maubisse, Munisipiu Ainaro.
Kazu nee deskobre hafoin komunidade sira hetan bebe nia isin mate neebe la kompletu tanba parte balun hetan husi asu han ona.
Tuir nota komunikadu neebe STL asesu iha pajina PNTL, Tersa (16/06) Kazu refere akontese iha loron 14 Junu 2026 tuku 07:00 dader, komunidade sira neebe deskobre bebe nia isin mate nee komunika kedas ba Polísia Eskuadra Maubisse. Ekipa polísia ba fatin hodi asegura evidensia no transporta bebe nia isin mate ba Mortuariu Hospital Referál Maubisse atu hein prosesu autópsia.
Nunee iha loron 15 Junu 2026, PNTL Munisípiu Ainaro halo koordenasaun servisu eskuadra polisia Maubessi neebe hodi realiza operasaun konjunta buka no identifika suspeitu sira neebe envolve iha kazu nee.
Durante operasaun nee, forsa konjunta konsege identifika suspeitu ho naran inisial AMCS, tinan 18, neebe halao hela tratamentu saúde iha Hospital Referal Maubisse.
Tuir rezultadu investigasaun inisial, suspeita nee mak inan husi bebe neebe hetan mate no soe iha area refere.
Hafoin halo prosesu identifikasaun no rekolla informasaun preliminar sira, autoridade sira lori suspeita ba Komandu PNTL Munisípiu Ainaro atu halao prosedimentu legal sira.
Depois prosesu identifikasaun remata, suspeita nee fila ba nia hela-fatin, maibe sei nafatin iha observasaun no kontrolu autoridade kompetente sira enkuantu hein prosesu legal no desizaun hosi tribunal tuir lei neebe vigora iha Timor-Leste.
Dadaun nee PNTL Munisipiu Ainaru kontinua halao investigasaun atu apura faktu hotu-hotu relasiona ho kazu nee no garante katak prosesu legal lao tuir dalan neebe loos no justu.
(alb)
