DILI, STLTIMORLESTE.com – Polisia Nasional Timor Leste (PNTL) liu husi Diresaun Servisu Investigasaun Kriminal (DSIK) identifika sidadaun estranjeru neebe involve iha atividade Scam Call Center maioria laiha pasaporte, ho razaun pasaporte iha ajensia nia liman.
Segundu Komandante Jeral PNTL, Komisaria Asistente Polísia, Natercia Eufrasia Soares Martins hatete, maioria sidadaun estranjeru sira neebe suspeitu ba atividade Scam Call Center nia pasaporte iha ema seluk no ajensia mak rekolha hodi rai.
Komisaria Asistente Polísia Natercia dehan, ho informasaun nee PNTL hein delegasaun Kompetensia husi Ministeriu Publiku (MP) atu bele hahu Investigasaun ba Ajensia sira neebe rekolha arguidu sira nia pasaporte.
“Durante prosesu nee ami identifika katak, maioria husi ema sira neebe involve iha Krime nee laiha pasaporte, balun dehan katak pasaporte iha Ajensia no balun iha advogadu, maibe ami seidauk buka tuir razaun tanba saida, Polisia kompleta ona autus no entrega ona ba Ministeriu Publiku, ami sei hein delegasaun Kompetensia atu kontinua Investigasaun,” Segundu Komandante Jeral PPNTL, Komisaria Asistente Polísia Natercia Eufrasia Soares Martins ba jornalista sira iha nia knaar fatin Komjer, Kinta (06/08/2026).
Nia esplika, delegasaun husi Ministeriu Publiku sei fo kbiit ba PNTL liu husi Diresaun Servisu Investigasaun Kriminal (DSIK) ho Polísia Sientifika Investigasaun Kriminal (PCIC) atu halo investigasaun klean liu tan ba ezaminasaun evidensia neebe prende ona, no liu-liu ba pasaporte sira neebe laiha arguidu sira nia liman.
Iha fatin hanesan, Portavoz PNTL, Superintendente Xefe Polisia, João Belo informa, durante operasaun ba atividade Scam Call Center nee Polísia hetan duni arguidu balun nee laiha pasaporte tanba entrega ona ba ema seluk atu trata viza no dokumentus sira seluk.
“Bainhira ami halo operasaun hetan duni arguidu sira laiha pasaporte, tanba nee ami kontaktu kedas ba Servisu Imigrasaun atu buka tuir dokumentus sira, ami kontinua servisu hamutuk ho Imigrasaun atu rezolve probelma ida nee,” nia deklara.
Nia hatutan, investigasaun sei buka klarifika iha ajensia sira limite deit ba servisu administrasaun ba dokumentus viajen ka iha deskonfia sira mos involve iha atividade Scam Call Center nee, inklui fasilitasaun ba rede kriminal transnasional nee.
PNTL husu mos ba ajensia atu koopera ho autoridade sira, liu-liu ba dokumentus no informasaun relevante neebe ajuda tebes ba investigasaun.
“Ema hotu-hotu konsidera nafatin inosente too iha desizaun final husi Tribunal,” nia afirma.
(ter)
