DILI, STLTIMORLESTE.com – Polisia Nasional Timor Leste (PNTL) liu husi Ekipa Servisu Informasuan Konjuta hamutuk ho Departamentu Investigasaun Kriminal Nasional (DIKN) kaptura tan suspeita nain 4 neebe envolve publika video iha Media Sosial.
Xefe Departamentu Investigasaun Kriminal Nasional (DIKN), Superintendente Polísia, João Belo dos Reis dehan, bazeia ba publikasaun iha media sosial horiseik, PNTL liu husi DIKN hamutuk Ekipa Servisu Informasuan Konjuta, esforsu lori vitima mai hodi identifika no imediatamenta vitima refere ba protesaun vitima nian.
Nia dehan, suspeitu nain 4 nee sira nia naran inisial mak Sl, SG, BAM, no SX husi Suku Tohu Metan, Aldeia Barlmeta. Kazu refere akontese tanba suspeitu sira lori arma branka hodi ameasa no baku mos vitima.
“Ita kaptura ona autor sira neebe involve iha kazu nee, atu nunee sira bele responsabiliza sira nia aktu neebe sira halo,” hatete Superintendente Polísia, João Belo ba jornalista sira iha Komado Jeral PNTL, Dili, Kinta (12/12/2024).
Nia esplika, PNTL esforsu hodi kaptura ona autor nain 4 iha sira nia hela fatin, no agora sei iha prosesu investigasaun nia laran.
Tuir informasaun neebe STL asesu iha terrenu, tuir lo-loos kazu nee akontese kleur ona, kuaze fulan rua ka tolu, mas publikasaun foin hetan. Durante nee vítima sira mos tauk atu relata informasaun nee mai iha PNTL, neebe ohin PNTL foin halo servisu makaas atu bele rekolha informasaun hotu, hodi submete ba iha Ministeriu Publiku (MP) no kazu nee akontese parte sae ba iha Mota-ulun Kasnafar nian.
(jen)
