DILI, STLTIMORLESTE.com – Komandante Munisipiu Díli (KMD), Superintendente Xefe Polisia Orlando Gomes hatete, iha akontesimentu kazu Sequestro neebe akontese iha area Bebonuk, Servisu Sekreta ho Servisu Polisia Eskuadra Dom Aleixo kaptura sidadaun Xina nain ida, hodi detein ba 72 oras molok aprezenta ba Ministeriu Publiku (MP).
“Ho akontesimentu nee ita nia informasaun sekreta detekta hodi informa mai iha Komando, no Komando ba foti sai vitima iha Apartamentu Bebonuk hodi lori mai para halo investigasaun, no kazu nee rasik ita halo ona prosesu, no suspeitu mos ita detein ba iha 72 oras no ita sei aprezenta ba Ministeriu Publiku (MP),” hatete Komandante Munisípiu Díli (KMD), Superintendente Xefe Polisia, Orlando Gomes ba jornalista sira iha Eskuadra Dom Aleixo Aimutin, Dili, Kinta (05/12/2024).
Nia dehan, kazu nee iha motivu, tanba arguidu sira bosok vitima para mai iha Timor Leste (TL), nunee arguidu sira bele hetan nia benefisiu husi sira nia asaun krimi neebe sira komete mak sira halo torturasaun ou kesi vitima iha kuartu laran.
Maibe sira mai haree vitima no sira hein prosesu kontinuasaun iha MP, suspeitu ho inisial LC no Vitima naran Zheng Pui Long, tanba kazu nee konsidera kazu Sequestro, nunee tenke prosesu ba iha tribunal.
Entretantu tuir informasaun neebe STL asesu iha terrenu katak, vitima ho suspeitu mai husi nasaun Xina, suspeitu durante iha Timor Leste halao negosiu depois mak nia halo asaun ida nee ba nia maluk, ho nunee PNTL hanesan Autoridade Seguransa Asegura ona vitima iha KMD no sei entegra ba Embaixador Xina no ba Asosiasaun Xina nian.
Tanba nee kazu nee rasik foin akontese husi ema Estranjeiru Xina ho Xina mak halo torturasaun ba malu, ho nunee PNTL rejista ho numeru Nuk 0863/24.
(jen)
