DILI, STLTIMORLESTE.com – Tuir kominikadu neebe STL asesu katak, Polisia Nasional Timor Leste (PNTL) liu husi Diresaun Servisu Investigasaun Kriminal (DSIK) kumpri mandadu detensaun no buska husi Tribunal Judisiál Primeira Instánsia Dili, ho Nuc 0014/24, PGCC detein suspeitu ho inisiál JFDA iha loron 08/08/2026, tuku 14:02 OTL, iha Aldeia Lebumera, Suku Foho-Ailico, Postu Administrativu Hatu-Udu, Munisípiu Ainaro.
Entretantu asaun detensaun no buska nee halao bazeia ba mandadu husi autoridade judisiária, tanba iha indísiu forte konaba alegasaun katak suspeitu JFdA iha envolvimentu iha krime falsifikasaun dokumentus ka notasaun tekniku agravada neebe prevee iha Artigu 303 no Artigu 304, alínea 1, Kódigu Penál Timor Leste.
Hafoin DSIK-PNTL kumpri mandadu detensaun no halao buska iha rezidensia suspeitu, remata kontinua kedas transporta suspeitu mai Dili atu kontinua submete ba prosesu investigasaun iha edifísiu DSIK, Kuartel Jerál PNTL, Caicoli, kontinua asegura iha sela detensaun durante oras 72 molok aprezenta ba Tribunal Judisiál Primeira Instánsia Dili atu hala’o interrogatóriu no foti desizaun tuir dispozisaun lei.
Nunee iha loron 10 Agostu 2026, Tribunal Judisiál Primeira Instánsia Dili, hafoin hala’o prosesu interrogatóriu, deside aplika medida koasaun termus identidade no rezidensia (TIR) aprezentasaun periodika (AP), ho obrigasaun ba suspeitu atu aprezenta aan dala ida kada fulan iha edifísiu Komando PNTL neebe besik.
Enkuantu PNTL liu husi DSIK kontinua halao servisu investigasaun kriminal bazeia ba mandatu no prosedimentu legal, ho respeitu ba direitu no garantia fundamental ema hotu, no asegura katak prosesu investigasaun no justisa lao tuir lei.
(jen)
