DÍLI, STLTIMORLESTE.com – Polisia Nasional Timor Leste (PNTL) Munisípiu Díli sei taka no regula dalan ba rota restus mortais preladus nain haat sei liu ba Se Katedral Dili halao serimonia Funebre.
Komandante PNTL Munisípiu Díli, Komisáriu Asistente Polísia, Orlando Gomes hato’o informasaun nee liu husi konferénsia imprensa iha Tasi-Tolu, Tersa (8/9/2026).
Orlando Gomes hatete, PNTL sei taka no regula rota neebe restus mortais preladus nain haat, Dom Jaime Garcia Goulart, Dom José Joaquim Ribeiro, Monsenhor Martinho da Costa Lopes no Dom Alberto Ricardo da Silva sei liu hafoin Santa Misa iha Tasi-Tolu, 10 Setembru 2026.
“Komando sei taka dalan husi rute sira ne’ebé restus mortais preladus na’in ha’at sei liu hafoin misa iha Tasi-Tolu. Ita sei taka hahu husi oras tuku 15:00. Dalan husi parte eskerda sei taka, no ita sei husik estrada parte direita atu halo movimentu ba mai,” dehan nia.
Nia hatete, medida taka dalan ne’e sei halao provizoriamente atu evita engarafamentu no permite konvoi trasladasaun lao ho diak no ho susesu.
Nia dehan, durante Santa Misa iha Tasi-Tolu, kareta privadu no transporte públiku sira sei orienta atu para iha area tasi ibun, too selamat datang iha baliza entre Díli no Liquiçá, rai metan.
Komandante Orlando Gomes hatete, entrada ba area serimonia iha Tasi-Tolu sei tama mak orgaun soberanu haat, membru Parlamentu Nasionál, Governu no entidade importante sira, inklui lideransa Igreja, bispu, padre no madre sira.
PNTL umenta seguransa Katedral iha Sé Katedral Dili, sei blokeia área identifikada ona hahu tuku 17:00, iha loron 10 Setembru.
Medida nee atu garante seguransa no ordenamentu, nunee serimónia funebre ba restus mortais preladus nain haat bele halao ho onra, dignidade, dame no hakmatek.
Komando hatete, tátiku tuir programa Igreja Katólika, ho objetivu atu garante seguransa iha Tasi-Tolu, iha rota konvoi no iha Katedral.
“Primeiru, ita hala’o seguransa iha Tasi-Tolu, segundu, ita sei koloka membru sira iha fatin risku iha rute no dalan neebe urna sei liu ba to’o katedral, terseiru ita sei tau seguransa iha Katedral ho masimu atu asegura serimónia funebre ba ita nia restos mortais,” dehan nia.
Nia mos apela ba públiku tomak, liu liu komunidade sarani no juventude sira atu kumpri regra tráfiku no tuir orientasaun PNTL durante misa iha Tasi-Tolu no serimónia funebre iha Katedral.
Nia husu ba sidadaun sira atu nafatin disiplinadu atu evita engarafamentu no ajuda garante prosesu trasladasaun no serimónia lao ho diak no ho susesu.
(joa)
