DILI, STLTIMORLESTE.com – Desizaun Konselhu Ministru (KM) desidi Ponte Kasnafar fo figura Internasional Kofi Annan, maibe distansia dook husi sidade.
Deputadu Bankada FRETILIN, Antoninho Sarmento hatete, desizaun Konselhu Ministru nian nee diak, tanbá hakarak sarani ponte Kasnafar ho figura influensiadu internasional ida hanesan Kofi Annan.
“Se hau nia opiniaun bele kontráriu, tanbá figura internasional ida hanesan Kofi Annan nee hakarak tau nia naran iha fatin sira mais estratejiku, karik hanesan ponte Kasnafar nee nia distansia dook oituan husi kapital”, katak Deputadu Antoninho ba STL iha Same, Kinta (05/12/2024).
Tuir nia, Ponte Kasnafar bele tau ho naran sira seluk hanesan eroi nasionais sira, enkuantu figura internasional hanesan Kofi Annan bele rezerva ba iha fatin estratéjiku sira seluk.
Deputadu nee espera ba oin mak atu ukun nain sira valoriza erói nasional sira iha fatin sira neebe sira merese atu bele tau mos sira nia naran.
“Tanba ita labele pesimista, maibe tenki optimizmu ho ita nia eroi nasionais sira hotu”, tenik Deputadu FRETILIN nee.
Entretantu Konselhu Ministru delibera hodi fo naran ba ponte foun Komoro Mota Ulun Kasnafar, ho naran Kofi Annan, nuudar Eis Sekretariu Jeral Nasões Unidas .
(gui)
