DILI, STLTIMORLESTE.com – Kondisaun estrada rural neebe kontinua sai tahu dodok iha tempu udan hamosu preokupasaun seriu husi Observador Ekonomia sira. Tanba realidade neebe hatudu povu tenke dudu kareta iha tahu laran laos deit kestaun transporte, maibe sai hanesan sinal ba moris susar ho kualidade kontrusaun neebe fraku (aat).
Observador Ekonomia, Sergio da Cruz Lopes preokupa katak, izolamentu neebe akontese tanba estrada aat sei hamate atividade negosiu iha foho. Banhira estrada aat kareta labele liu, presu sasan nesesidade baziku iha komunidade sira nia leet sei sae makas, tanba kustu transporte neebe karun.
“ Bainhira kareta ida gasta loron tomak hodi dudu deit iha tahu laran, ida nee kustu boot ba kombustivel no tempu. Ikus mai povu kiik mak selu folin ida neebe liu husi presu modo, foos, mina sona neebe sae,”dehan Sergio ba STL, iha Delta, Dili, Segunda (04/05/2026).
Sergio mos kestiona kualidade estrada neebe foin hadia maibe naksobu no aat fali ona, hodi konsideira katak nee nuudar kontrusaun kualidade kraik, neebe la tuir padraun tenkniku no la sustentavel ba tempu naruk.
Tanba investimentu Estadu neebe milhaun ba milhaun ba estrada tenke fo rezultadu neebe sustentavel.” Se tinan tinan Governu gasta osan deit ba manutensaun emerjensia neebe laiha kualidade, nee konsideira hanesan fakar saugati deit povu nia osan,”dehan nia.
Iha parte ketak komunidade no Motorista sira espresa sira nia sentimentu triste ho situasaun nee. Iha imajen no vidio neebe sirkula iha Media Sosial hanesan Facebook, TikTok, YouTube no seluk tan hatudu povu tenke luta ho tahu no dudu kareta hamutuk, atu bele hakat liu tahu neebe klean hanesan mota.
Entretantu antes nee Ministru Obras Publika ( MOP), Samuel Marcal kompromete Governu sei hadia estrada neebe aat iha area rural, tuir orientasaun Primeiru Ministru ( PM), Kay Rala Xanana Gusmao, atu aselera distribuisaun produtu komunidade sira nian, no hadia asesu ba servisu saude, edukasaun, transporte emerjensus ho seluk tan.
(car)
