AMBENO, STLTIMORLESTE.com – Povu iha Rejiaun Administrativu Espesial Oekusi-Ambeno (RAEOA) sente triste, tanba tinan nee Governu Timor Leste (TL) liu husi Ministeriu Asuntu Kombatente Libertasaun Nasional (MACLN) ho Konselhu Veteranus Oekusi la realiza eventu ruma hodi selebra loron nasional veteranus nian.
Tuir Ernestu Timo ‘Suku Biloka’ Kombatente Oekusi 8a14, neebe oras nee asumi knaar Xefe Aldeia Makelab ba STL, Segunda nee (03/03/2025) katak, ohin hamutuk ho povu Oekusi area foho mai atu tuir isar bandeira Nasional Timor Leste hodi komemora loron Nasional Veteranus iha Oekusi, maibe ohin laiha atividade ba eventu boot nee.
“Hau hanesan kombatente ida ho grau 8a14 sente triste, tanba loron boot nee Autoridade RAEOA ho Konselhu Veteranus Rejional Oekusi laiha programa ruma hodi selebra loron istoriku ida nee. Oekusi Veteranus barak los, maibe laiha nasional husi ukun nain sira atu organiza povu halo atividades ruma kona-ba loron boot nee,” dehan nia.
Tuir nia katak, uluk organiza malu laiha osan, maibe ho fuan boot tama sai bairu, lao ain deit hodi organiza malu oinsa liberta rai Timor Leste no sai realidade katak ukun rasik aan, ohin liberdade ona, laiha ema ida mak iha kapasidade organiza povu hodi selebra loron nasional veteranus iha Oekusi.
Labele depende Osan Estadu
Atu komemora loron Nasional nee, nuudar Veteranus neebe durante nee balu simu ona osan, tuir los organiza malu hodi selebra loron boot nee, la presiza osan, maibe halibur malu oinsa halo reflesaun ruma ga halo programa nuudar veteranus atu hatudu valorizasaun ba loron boot nee ba jerasaun foun Sira.
“Hau sente triste tanba ohin loron boot importante nee labele realiza, pior liu tan mak rona informasaun husi Komselhu Veteranu Oekusi katak orsamentu ba loron boot nee kanseladu hotu, ita labele hanoin uluk osan, importante ita tenke iha programa ruma ba loron boot nee. Ohin ami kombatente Oekusi husi area foho mai kapital Oekusi atu festeza loron boot nee, maibe ukun nain aira laiha ema ida atu organiza,” nia akresenta.
Nia rekomenda nafatin atu kada tinan, katuas veteranus sira tenke halibur malu hodi selebra loron boot nee, tanba ohin estudante sira husi kada eskola mak komemora loron boot nee liu husi serimonia isar bandeira, maibe katuas veteranus sira nunka iha fuan boot hodi fo ezemplu ba jerasaun foun sira.
Iha oportunidade nee, Firmino Oqui nuudar membru kombatente husi Organizasaun Santo Antonio Tulaika mos sente triste, tanba tinan nee labele realiza eventu loron nasional Veteranus.
“Hau triste tanba uluk mate ka moris ukun rasik aan, maibe ohin loron hetan ona liberdade, tau loron 3 de Marsu nuudar loron nasional Veteranus nian, maibe laiha eventu ruma ba loron boot nee, nuudar Kombatente ida iha Oekusi sente triste,” dehan nia.
Nunee mos Jose Sila ‘Maukiak’ husi Suku Costa konfesa katak, nuudar kombatente ida sente triste, tanba tinan nee laiha eventu ruma hodi festeza loron nasional Veteranus nian iha Oekusi.
Tuir Veteranus Oekusi, João Tabes katak, komemora loron Nasional Veteranus atu realiza maibe orsamentu ba eventu nee kanseladu hotu husi Ministru Asuntu Kombantente Libertasaun Nasional (MACLN), tanba preokupa ho lista editais neebe oras nee sai preokupasaun ba publiku.
(jos)
