DILI, STLTIMORLESTE.com – Prezidente Republika (PR), Jose Ramos Horta enkoraja juventude Timor Leste atu konsentra iha dezenvolvimentu, abilidade teknolojia no tekniku.
Prezidente Republika, Jose Ramos Horta hatoo lia hirak nee bainhira hasoru malu ho reprezentante Rotary Youth Leadership Awards Timor Lorosae (RYLA-TL), iha palasiu Prezidensial, Nicolau, Lobato, Bairo Pite, Dili, Sabadu (08/03/2025).
Rotary Youth Leadership Awards Timor Lorosae (RYLA-TL) organizasaun neebe hahu iha tinan 2010 ho deit partisipante nain 63, buras makaas no agora fo ona formasaun maizumenus lider potensial foinsae nain 1,500 iha Timor Leste laran tomak.
Iha hasoru malu nee Prezidente Republika enkoraja Timor Leste nia juventude sira atu konsentra iha dezenvolvimentu abilidade teknolojiku no tekniku, enkuantu mantein konsiensia kona-ba protesaun ambiental. Apoiu prezidensial neebe kontinua nee reforsa dedikasaun hodi prepara jerasaun lider foun sira tuir mai ba nasaun.
Iha biban nee, Diretor Atual RYLA-TL, Octavio Da Silva Monteiro afirma, hafoin enkontru katak, hanesan onra ida atu hasoru malu ho Prezidente durante momentu importante ida nee, hodi sublina signifikadu husi líder nasaun sira nia apoiu iha dezenvolvimentu juventude nian.
Iha enkontru nee, Prezidente Republika Ramos Horta konfirma, nia prezensa nuudar orador konvidadu prinsipal iha RYLA-TL nia konferensia ba dala-16 oin mai, neebe tuir planu sei halao iha Sentru Formasaun Tibar iha fulan Setembru.
Nia hatutan, RYLA-TL habelar ona liu ninia formasaun prinsipal ba lideransa hodi inklui ajuda umanitaria liu husi programa parseria, estajiu, atividade desportu, no inisiativa protesaun ambiental.
Organizasaun nee nia kresimentu mai husi ninia ligasaun inisial ho Distritu Rotary 9685, neebe konvida foinsae Timoroan sira atu partisipa iha formasaun lideransa ho apoiu husi Kirsty Sword Gusmão no Fundasaun Alola. Tanba ninia impaktu makaas, no Glockeman ajuda estabelese hanesan programa lokal iha Timor Leste iha tinan 2010.
Enkontru entre Prezidente Ramos Horta ho RYLA-TL nee reprezenta kolaborasaun neebe lao hela entre lideransa nasaun no organizasaun juventude sira iha Timor Leste. Nuudar nasaun kontinua dezenvolve inisiativa sira hanesan RYLA-TL dezempena papel krusial hodi fo kbiit ba sidadaun foinsae sira atu sai líder efetivu iha setor oin-oin, hodi kontribui ba nasaun nia kresimentu no estabilidade iha tinan hirak tuir mai.
(eme)
