DILI, STLTIMORLESTE.com – Prezidente Republika (PR), Jose Ramos Horta entrega Premiu manan nain sira iha Kompetisaun Diskursu Publiku SCI TECH, iha Palasiu Prezidensial, Nicolau Lobato, Bairo Pite, Dili.
Iha biban nee Prezidente Republika, José Ramos Horta liu husi nia diskursu iha Palasiu Prezidensial Bairo Pite, Kinta nee (5/12/2024), hatoo parabens ba Visi Primeiru Ministru ho Ministeriu Ensinu Auperior Siensia no Kultura ho ekipa Prezidensia Republika nia bele realiza eventu ida hodi realiza diskursu publiku.
“Hau orgulhu bainhira rona diskursu Timoroan barak diak liu tan, tanba nee mak iha fulan Maiu nee hau fo kondekorasaun hodi fo rekonhese ba Timoroan neebe remata doutoramentu atus ida resin primeiru Grupu mai husi UNTL neebe iha numeru boot liu nomos ho Universidade seluk,” katak Prezidente Republika.
Prezidente Republika mos hatoo agradese ba Ministeriu Edukasaun Ensinu Superior neebe kolabora makaas ho Prezidensia Republika no Prezidensial mos kolabora ho Ministeriu Edukasaun ho Ministeriu seluk neebe hamutuk halo atividade neebe konjutamente.
Iha biban nee Prezidente Republika husu mos ba estudante sira nafatin Estuda makaas, tanba futuru nasaun iha joven sira nia liman.
Iha biban nee Visi Primeiru Ministru, Mariano Assanami Sabino hatoo apresia no agradese Prezidente Republika nomos Xefe Kaza Sivil no adjunta no ekipa neebe durante nee fo apoiu masimu ba atividade lubuk ida durante nee.
Hatoo agradese ba mos ba ekipa Ministeriu Ensinu Superior, tanba atividade ida nee mak rohan husi atividade lubuk ida neebe mak husi Ensinu Superior halo.
“Atividade nee ikus ona, apresia ba reitores sira no estudante sira hotu neebe durante nee fo apoiu ba atividade hotu ohin hakotu, iha komponente 4 neebe ita halo ho vizaun Prezidente nia komponente ida mak promove turizmu no kultura ita nia neebe halo iha Rabilau, ida seluk mak lideradu husi Ministra Edukasaun, nee mos halo atividade lubuk ida mak husi Ensinu Superior ikus mak ida nee, no ida mak ho Ministeriu Juventude no Desportu,” dehan Visi PM Mariano Assanami Sabino.
Visi Primeiru Ministru hatoo agradese ba Prezidente Republika nia vizaun, hein katak iha 2025 kontinua promove atividade Timor Leste nia.
Apresia mos ba joven sira, Estudante sira neebe mak halo kompetisaun iha diskursu publiku, ida nee importante tebes, tanba diskursu ho lian português, tanba lian portugues mos hanesan lian ofisial Timor Leste.
“Tanba nee mak imi hotu neebe aprende no kompete balun seidauk nia tempu maibe husu kontinua aprende hodi tuir Kompetisaun tuir mai,” katak nia.
Diretora Jeral Ensinu Superior Siensia no Kultura, Maria Filomena Lay hatutann diskursu publiku halao iha loron 25 no 26 Novembru no partisipa husi estudante nain 27 husi Institutu Ensinu Superior. Estudante idak-idak aprezenta diskursu minutu 10 kona-ba “Sciensia, Teknolojia no Inovasaun dalan ba transformasaun no dezenvolvimentu sustentavel iha Timor Leste.” Diskursu 5 neebe diak liu sei fo sai husi nee pelumenus.
“Kompetisaun daruak, Olimpiku Konhesimentu, hahu iha loron 3 no 4 Dezembru no halao area Lei no Ekonomia no Jestaun. Estudante sira hatan ba ida nee kona-ba area espesífiku sira nee no mos konhesimentu jeral kona-ba Timor-Leste, ASEAN nia fatin no CPLP. Atividade ne’e envolve estudante direitu nain 15 husi instituisaun ensinu superior nain 5 no estudante ensinu superior nain 24 husi instituisaun ensinu superior nain 8,” katak DJ.
(eme)
