DILI, STLTIMORLESTE.com – Prezidente Republika (PR), José Ramos Horta halo enkontru ho Membru Konselhu Superior Defeza no Seguransa (KSDS), desidi hamutuk oinsa mak bele hametin kooperasaun entre entidade seguransa iha rai laran.
Lia hirak nee hatoo husi Portavos (KSDS), João Aparicio ba jornalista sira iha Palasiu Prezidensial, Nicolau Lobato, Bairo Pite, Dili, Sesta (27/12/2024).
Nia hatete, ohin Prezidente Republika prezide reunian ho membru Konselhu Superior Defeza no Seguransa, hodi koalia kona-ba balansu seguransa 2024 no avalia Seguransa nasaun nia.
“Enkontru ohin nian nee kona-ba balansu seguransa tinan 2024 atu avalia situasaun seguransa nasaun nia, ita hotu hatene katak iha tinan ida nee, maibe liu-liu iha fulan Setembru vizita Sua Santidade Papa Francisco nia mai ita nia rai lao diak tebes,” dehan Portavos nee.
Portavos KSDS nee dehan, iha reuniaun hatudu sinal de konfiansa, sinal de serienidade, sinal trankualidade, signifika katak iha respeitu boot tebes entre ita Timoroan fiar nain neebe simu Sua Santidade Papa Francisco.
No iha enkontru nee koalia pontu ida seluk naturalmente kona-ba oinsa kontinua hametin seguransa iha rai laran.
“Kontinua hametin kooperasaun entre entidade seguransa rai laran nian no partementu estadu hotu-hotu neebe kolabora hodi hametin ordem publika iha parte ida, no iha parte ida seluk prevensaun atu prevene konflitu neebe bele mai iha tinan oin mai,” dehan nia.
Nia hatutan, Prezidente Republika (PR), Horta konvida membru sira atu halo balansu seguransa ba tinan 2024, depois koalia hamutuk medida seguransa saida mak bele foti iha pasajen de ano hodi tama tinan foun.
Iha enkontru Konselhu Superior Defeza no Seguransa nee marka prezensa husi Primeiru Ministru, Kay Rala Xanana Gusmão, Depuatadu David Dias Mandati, Julio Tomas Pinto, no seluk tan.
(eme)
