DILI, STLTIMORLESTE.com — Prezidente Repúblika (PR), José Ramos-Horta despede ekipa literatura husi navio Doulos Hope iha Portu Dili, Segunda nee (07/09/2026), depois de ekipa ne’e remata vizita daruak ba Timor-Leste.
Prezidente José Ramos-Horta hateten katak, Doulos Hope mai Timor-Leste dala-rua. Vizita daruak ne’e akontese iha fulan Agostu, depois Prezidente konvida ekipa ne’e atu fila fali ba Timor-Leste.
Tuir Prezidente, prezensa navio ne’e importante tanba fó oportunidade ba labarik no juventude atu asesu livru sira, liuliu livru edukativu kona-ba natureza, siénsia, istória no kontu ba labarik.
Prezidente mos hateten katak navio ne’e halo livru sira disponivel ho folin asesivel, nune’e komunidade bele sosa no uza livru sira atu aprende.
Durante vizita iha Dili, navio Doulos Hope hela besik fulan ida no organiza atividade literatura no leitura ba komunidade.
Prezidente José Ramos-Horta mos komprá livru atus-ba-atus no fó ba labarik Timor-Leste, hanesan forma ida atu apoia kultura leitura no edukasaun.
Iha seremónia despedida, Prezidente agradese Diretora Literatura Doulos Hope, Felicia Coulter, no Kapitán Eymard Calibjo, hamutuk ho tripulasaun tomak, tanba sira-nia kontribuisaun ba komunidade.
Ekipa Literatura Hakarak Fila Fali
Diretora Literatura Doulos Hope, Felicia Coulter, hateten katak ekipa ne’e iha interese atu fila fali ba Timor-Leste atu kontinua promove leitura, envolvimentu juventude no troka kultura liuhosi literatura.
Nia hateten katak vizita sira-ne’e fó esperiénsia importante ba ekipa, tanba komunidade no família sira hatudu apresiasaun ba programa literatura ne’e.
Felicia mos hateten katak separasaun ho Timor-Leste lori sentimentu triste, maibé nia hein katak despedida ne’e la’ós finál, maibé sei hasoru malu tan iha futuru.
Doulos Hope Simu 22.000 Visitante
Kapitán Eymard Calibjo hateten katak vizita daruak ba Timor-Leste simu aproximadamente 22.000 visitante.
Durante vizita, ekipa Doulos Hope vizita eskola no servisu komunidade, inklui atividade fahe ókulu ba ema sira ne’ebé presiza.
Eymard konsidera Timor-Leste hanesan fatin ida ne’ebé fó sentimentu hanesan uma, tanba akollimentu no hospitalidade husi komunidade.
Nia mos agradese lideransa Prezidente no autoridade sira ne’ebé fó tempu atu vizita navio no partisipa iha atividade feira livru.
(jos)
