DILI, STLTIMORLESTE.com – Prezidente Republika (PR), Jose Ramos Horta halo despedida ho Embaixador Okto Dorinus Manik iha Aeroportu, tanba mandatu remata ona.
Prezidente Republika, Jose Ramos Horta despedida ho Embaixador Indonezia ba Timor Leste, Okto Dorinus Manik iha Aeroportu Internasional Nicolau Lobato, Kinta (01/04/2026), tanba embaixador nia mandatu remata ona iha Timor Leste, hodi halao fali misaun iha nasaun seluk.
Xefe Estadu espresa apresiasaun klean ba Embaixador nia esforsu makaas hodi hametin relasaun fraternidade no kooperasaun entre Timor Leste no Indonezia durante nia mandatu. Hamutuk ho nia família, Embaixador Manik simu apresiasaun ba nia relasaun diak tebes ho governu, kolega diplomatiku sira, no nia kontribuisaun ativa ba dezenvolvimentu sosial no polítiku nasaun nian.
Refleta fali kona-ba Embaixador nia mandatu, Prezidente Ramos Horta nota katak ida.nee marka ho akontesimentu istoriku signifikativu sira, inklui vizita apostolika husi Amu Papa Francisco no vizita nivel altu husi Prezidente India no Primeiru Ministru Malazia.
Prezidente destaka oinsa períodu nee haree Timor Leste nia integrasaun neebe firme ba ASEAN, aumentu iha investimentu rejional, no espansaun ba konektividade internasional. Susesu sira nee, tuir Prezidente, hasae signifikativamente Timor Leste nia pozisaun diplomatika iha rejiaun laran.
Iha parte estratejika, Prezidente sita progresu signifikativu neebe halo ona iha negosiasaun fronteira terrestre no marítima, hodi hatoo konfiansa katak kestaun sira nee besik ona atu konklui ho susesu.
Bainhira Embaixador Manik halao fali nia misaun tuir mai, Prezidente Ramos Horta mantein optimista kona-ba futuru relasaun bilateral nian.
Xefe Estadu reafirma katak, Governu Indonezia sei kontinua haburas parseira neebe bazeia ba respeitu mutuu no amizade neebe metin ona durante tinan hirak ikus nee.
(eme)
