DILI, STLTIMORLESTE.com – Prezidente Republika (PR), Jose Ramos Horta halao enkontru ho Embaixadora Xina ba Timor Leste (TL), Wang Wenli, hodi hametin kooperasaun iha area edukasaun.
Bainhira remata hasoru malu, Embaixadora Xina ba TL, Wang Wenli ba jornalista sira iha Palasiu Prezidensial Nicolau Lobato, Bairo Pite, Tersa (14/07/2026) hatete, halao reuniuan ho Prezidente Republika Jose Ramos Horta diskute hamutuk hodi hametin kooperasaun rai rua liu-liu iha area edukasaun, asistensia sosial no seguransa sibernetika.
Embaixadora dehan, Xina apoiu TL iha area edukasaun nee dezde 2019, Xina estabelese bolsu estudu fo oportunidade ba estudante sira iha UNTL. No 2023 sei fornese oportunidade ida nee ba estudante sira husi IOB.
“Esensialmente buat hotu neebe ami fornese ona fornese liu oportunidade ba estudante sira. No iha tinan ida nee, ami sei fornese tan oportunidade hamutuk 136,” katak nia.
Iha reuniaun nee foku prinsipal mak haluan apoiu edukasaun nian, neebe Embaixadora fo sai harii fundu edukasaun espesial hodi ajuda estudante Timor sira neebe hakarak kontinua estudu iha nível superior.
Inisiativa nee bazeia ba susesu programa bolsa estudu Embaixadora Xina nian, neebe ajuda ona estudante liu 600 dezde 2019, ho tan bolsa 136 ba tinan nee iha UNTL no IOB.
Aleinde inisiativa edukasaun nian, diskusaun nee mos koalia konaba asistensia sosial ba area rural sira, inklui planu doasaun material hodi ajuda família sira iha munisípiu sira. Konaba kazu buras husi burla online, Embaixador Wang reafirma Xina nia pozisaun makas kontra krime sibernetiku no fo parabens ba PNTL tanba sira nia asaun ba aplikasaun lei ho lalais no efisiente.
Lider nain rua nee hatudu sira nia kompromisu hodi kria ambiente sosial seguru neebe proteje interese negosiu legal, hodi fasilita koperasaun neebe lao hela no protokolu deportasaun entre sirania ajensia seguransa respetivu.
Iha biban nee Prezidente Republika Jose Ramos Horta husu kooperasaun bilateral nee kontinua ba oin, hodi hametin liu tan lasu amizade rai rua iha futuru.
(eme)
