DILI, STLTIMORLESTE.com – Prezidente Republika (PR), Jose Ramos Horta hatete, atu halo reforma ba funsionariu publiku (FP) tenke ho kuidadu no ho fuan, tanba funsionariu sira nee mos iha familia neebe presiza hetan sustenta.
Prezidente Republika Jose Ramos Horta hatoo kestaun nee ba jornalista sira, bainhira remata halo vizita ba funsaun publika iha Kaikoli, Tersa (05/05/2026) hatete, atu halo reforma tenke halo ho kuidadu prudensia ho fuan tanba ema lubuk ida buka servisu iha funsaun publika.
Iha biban nee Prezidente Republika hatoo agradese ba oportunidade ida nee, hodi mai iha sede funsaun publika nian no agradese ba Prezidente KFP ho ekipa tomak neebe halo ona aprezenta diak no klaru hatudu sira nia mandatu sira nia servisu diak ho kualidade iha sistema modernu bele ajuda fo garantia ba imparsialidade no integridade, kuandu halo prosesu ezame ba funsionariu foun tama.
“Funsaun Publika bazeia ba lei iha regra neebe modernu ho ita nia adezaun ba ASEAN, ezijensia boot liu tan para ita moderniza profesionaliza didiak funsaun publika, hau haree tinan sira nee nia laran nee sira bee simu todan laos fasil, maibe tinan hira nia laran ita haree iha melhoramentu iha progresu, maibe numeru funsionariu sira sei aas demais nee insustentavel, se ita nia numeru populasaun no ita nia orsamentu nee ita bele hatete laos sustentavel maibe mos atu halo reforma tenke halo ho kuidadu prudensia ho mos fuan, tanba sira lubuk ida los mai buka serbisu iha funsaun publika iha neebe laos deit tanba partidarizasaun maibe tanba ema presiza duni servisu,” dehan PR Horta.
Prezidente Republika hatete, sira neebe tama rihun ba rihun tanba sira familia iha oan ou balun joven laiha familia laiha oan, maibe sira mos iha nesesidade rasik tanba nee labele derepente halo desizaun ida hamonu numeru nee.
“Labele derepente halo desizaun ida hamonu tiha numeru nee hatun no hasai 20 mil ka 30 mil, hau laiha kalku ba numeru sira mak Timor Leste presiza duni ita nia populasaun ita nia ekonomia, ita nia estadu nia funsionamentu maibe 60 mil imposivel koa karik 50% sei aas nafatin tanba agora liu liu ho sistema modernu AI serbisu barak mak bele halo, maibe buka alternativu,” katak Horta.
Ni hatete, konaba alternativa Timor oan barak hetan ona tanba lubuk ida serbisu iha rai liur, korea, inglatera nemak alternativu laos deit ba ema nia rai buka osan maibe balun ba estuda balun serbisu makaas haruka osan mai familia no hatama osan lubuk ida mai rai laran.
Xefe Estadu hatete, tuir haree no observasaun ba funsaun publiku dadaun nee fraku tebes intermus kualifikasaun no protividade.
Prezidente Komisaun Funsaun Publika, Agostinho Letencio de Deus hodi komisaun funsaun publika no funsionariu tomak iha teritoriu tomak hatoo Benvindo no agradese tebes ba Prezensa husi Prezidente Republika liu liu ba mensajen sira neebe ohin hatoo laos deit ba komisaun sekretariadu maibe mensajen ida nee ba funsionariu publiku tomak.
“Importante mos mensajen ida ohin mak ita nia servisu sira tenke banati tuir valores no prinsipiu servisu nafatin iha etika no displina nia laran,” dehan Prezidente Komisaun Funsaun Publika.
Nunee mos konaba halakon IP-EP nee koalia konaba reajustamentu husi ministeriu finansas sei diskute hela konaba papel kada idak idak nia liu husi ida nee mak haree ida neebe mak kontinua ejiste bele kontinua tanba nee mak iha hela diskusaun neebe lao hela.
(eme)
