DILI, STLTIMORLESTE.com – Prezidente Republika (PR ), Jose Ramos Horta haree direita Fosil Reptil marinu iha Cailaco, Munisipiu Bobonaro.
Iha loron kuarta (08/04/2026) Prezidente Republika, Jose Ramos-Horta halo vizita direta ba foho Lesululi, Postu Administrativu Cailaco, Munisípiu Bobonaro, hodi haree fosil reptíl marinu ida neebe identifikadu ona hanesan Ichthyosaurus, neebe konsidera mos ho idade liu ona tinan milhaun 208.
Fosil nee, tuir informasaun sientífika, konsidera nuudar patrimoniu jeolojiku importante ida ba Timor-Leste. Vizita nee refleta interese Estadu nian hodi promove investigasaun sientífika no konservasaun patrimoniu natural ba ita-nia rain Timor-Leste.
Durante vizita, Prezidente sublina katak deskoberta nee bele sai pontu estratejiku ida ba dezenvolvimentu turizmu sientífiku no edukativu, liu-liu iha Munisípiu Bobonaru. Nia mos husu atu entidade relevante sira kontinua halo estudu klean hodi garante konservasaun no aproveitamentu sustentavel ba futuru.
Autoridade lokal no komunidade iha area nee simu ho entuziazmu prezensa Prezidente nian, no espera katak atensaun Governu nian bele lori benefísiu real ba dezenvolvimentu lokal.
Iha okaziaun nee, Vise-Prezidente Institutu Jeosiensia Timor-Leste (IGTL), Eng. Victor Aleluia de Sousa Vicente, hateten katak atu halo kobertura dokumentariu ida kona-ba fosil nee, ho planu atu publika iha 2028, hodi promove Cailaco no Timor-Leste ba nível internasional.
Nia hateten katak inisiativa tuirmai mak atu lori sítiu fosil nee hodi hetan rekonesimentu nuudar UNESCO “Global Geopark”, maski prosesu nee la fasil. Maibe, se rekonese, bele atrai turista no investimentu no dinamiza ekonomia lokal hanesan alojamentu, restaurante no otelaria.
Entretantu, jeologista Isaias dos Santos Barros, neebe deskobre fatin fosil nee, sei kontinua servisu hamutuk ho peritu sira atu prepara artigu sientífiku ida ho kualidade ba publikasaun iha jornal internasional, hodi hasae importansia sientífika husi deskobrimentu fosil refere.
Komunidade sira iha Cailaco simu vizita Prezidente ho entuziazmu, no konsidera fosil nee nuudar patrimoniu no rikusoin neebe presiza ema hotu proteje. Iha momentu hanesan, Ekipa Prezidensia Republika liuhusi Unidade Servisu Sosiedade Sivíl no Asuntu Sosial (SSAS) distribui mos nesesidade bazika hanesan ai-han, roupa no ekipamentu desportu ba komunidade sira neebe mai husi suku ualu (8) iha Postu Cailaco.
(eme)
