DILI, STLTIMORLESTE.com – Prezidente Republika (PR), Jose Ramos Horta hamutuk ho komunidade Melbourne, Australia, komemora aniversariu ba dala 50 refujiadu dahuluk Timor-oan sira.
Prezidente Republika (PR), Jose Ramos Horta ba jornalista sira iha Aeroportu Internasional Nicolau Lobato, Comoro Segunda (03/08/2026) hatete, nia viajen ba iha Melbourne, Australia, privadu no komunidade sira ho kontente simu Prezidente Republika hamutuk hodi komemora aniversariu ba dala 50 refujiadu Timoroan sira nian dahuluk iha rai Australia.
“Liu tiha nee ba Melbourne, Australia vizita privadu ho komunidade iha neeba organiza diak tebe-tebes, ema besik atus ualu, lubuk ida la tama tanba fatin laiha, too atus sia ka rihun ida, sira hotu hotu kontente ho Prezidente Republika nia vizita, ba la halo enkontru ho Governu tanba hau la husu enkontru, hau hatete kedas iha deit loron ida iha neeba tenke fila kedas,” dehan Prezidente Republika Jose Ramos Horta.
Prezidente Republika partisipa iha serimonia komemorativa ida iha Melbourne, iha loron Sabadu, hodi marka aniversariu ba dala 50 too fatin refujiadu Timoroan sira nian dahuluk iha rai-Australia.
Eventu istorikamente signifikativu organiza husi Komisaun Organizadora Richmond (Richmond Organizing Committee) iha Frank Leong nia lideransa okos, halibur membru sira husi diaspora Timor, belun Timor Leste nian, no reprezentante sosiedade sivíl sira.
Komemorasaun nee fo onra ba família pioneru sira neebe buka refujiu iha Australia hafoin krize polítika no konflitu internu neebe akontese iha Timor Leste iha fulan-agostu 1975.
Prezidente Ramos Horta nia prezensa iha Melbourne nee akontese hafoin ramata nia Vizita Estadu istorika dahuluk ba Republika Vanuatu, neebe halao entre loron 28 too 31 fulan Julhu.
Hodi asosia ba komemorasaun istorika signifikativa nee, Prezidente Ramos Horta fo omenajen ba refujiadu Timoroan sira-nian dahuluk neebe harii moris foun iha Australia iha dekada lima liuba.
Xefe Estadu rekonese korajen, reziliensia, no dignidade esepsonal husi sira neebe obriga tenke husik sira nia patria durante períodu ida neebe dezafiante tebes iha istoria kontemporanea Timor Leste nian, hodi fo mos louvor ba diaspora sira-nia ligasaun neebe duradoura ho sira-nia rain-moris.
(eme)
