DILI, STLTIMORLESTE.com – Prezidente Republika (PR), Jose Ramos Horta husu povu no joven sira haklean dame, nunee selebra festa Natal ho ksolok, hodi simu Kosok Oan Jesus.
Prezidente Republika Jose Ramos Horta hatoo lia hirak nee liu husi mensajen Natal nian ba povu TL, Tersa (17/12/2024).
Nia hatete, sura deit ona loron sarani katolika iha mundu tomak selebra festa Natal no tinan foun, tan nee Prezidente husu Timoroan hotu atu hakribi violensia hodi haklean dame iha rai laran no garante estabilidade no pas.
PR Horta dehan, tempu Natal, tempu sarani sira nian, tempu dame ba mundu tomak, laos sarani deit, maibe relijiaun sira hotu-hotu iha mundu. No tempu Natal sira mos hanesan respeita no observa, tanba reprezenta populasaun 1 bilhaun resin iha mundu, sai tiha ona hanesan eventu istoriku mundial global, tanba mensajen Natal laos deit mensajen ba sira neebe simu fee Kristaun, relijiaun hotu-hotu, simu no hakuak valores neebe katoliku Kristaun sira kaer kona-ba dame fraternidade umana ba hadomi malu, tulun sira neebe moras no sira neebe iha difisiensia no sira neebe servi vizaun no sira neebe iha funu no sira neebe mate, tanba funu ou sira neebe moras iha hospital.
“Hau husu ba Timoraon hotu haklean liu tan dame iha rai laran, hau husu ba joven sira para halo hanesan foin daudaun Amu Papa nia vizita iha loron 09 too 11 Setembru liu ba, populasaun rihun atus 7 resin partisipa direitamente ou inderitamente Amu Papa nia vizita, la iha violensia no situsasun hakmatek too Amu Papa fila husi Timor Leste. Tempu Natal, tempu familia, maibe tempu mos para ita haree ba vizinhu sira, se mak iha hahan extra, sasan seluk hanesan hena, aimoruk, ai-fuan no buat ruma liu karik buka sira neebe la iha buat ida, iha estrada ninin hateke deit ita haree deit la han no la hemu, no sira neebe ita hatene ferik no katuas hela mesak iha uma, la iha meius la iha osan oituan, la hetan ajuda, ita buka ajuda sira. Nee mak lo-loos espíritu Natal, “ dehan PR Horta.
Xefe Estadu hatete, tempu Natal presiza mos tulun sira neebe laiha kbiit, laos deit atu sira neebe osan sosa sasan oin-oin, festa boot, hemu tua no haluhan tiha vizinhu no Maromak nia oan sira neebe moris iha susar nia laran. Maibe Natal tenke hanesan Natal fraternidade, Natal nee atu simu Nain Maromak, no kumpri hodi halo tuir Nain Maromak nia mensajen, hanesan mensajen dame, mensajen domin no mensajen fratenidade umana.
PR dehan, publiku hatene governu nia responsabilidade atu kria kondisaun ba povu, atu povu bele moris diak liu.
Nunee mos Primeiru Ministru Kay Rala Xanana Gusmão mos husu povu tomak mantein pas no estabilidade iha rai laran, nunee selebrasaun festa Natal lao ho pas no domin nia laran no haksolok hamutuk hodi simu tinan foun 2025.
(eme)
