DILI, STLTIMORLESTE.com – Prezidente Republika (PR), Jose Ramos Horta husu Universidade Nasional Timor Lorosae (UNTL) atu halo kooperasaun ho Universidade Nusa Tengara Timur (NTT), nunee harii Universidade iha Fronteira.
Prezidente Republika Jose Ramos Horta hatoo lia hirak nee ba jornalista sira, bainhira remata partisipa konferensia Transfronteira Internasional Science Without Borders neebe halao iha Auditorium FECT, UNTL, Hera, Kuarta (07/05/2025).
Xefe Estadu dehan, UNTL presiza halao kooperasaun ho Universidade NTT atu diskute planu harii universidade iha zona fronteira, tanba Timor Leste sadere Fronteira ba malu.
“Hau nia mensajen mak uluk inaugura Eskola Politeknik Hera nee hau dehan tenke buka atu hametin kooperasaun ho Indonezia em partikular propinsi NTT neebe ita sadere fronteira ba malu.” dehan Prezidente Republika.
Prezidente dehan, presiza halo kooperasaun entre UNTL ho Universidade NTT nunee tau hanoin hamutuk atu harii universidade tekniku ida iha zona fronteira hodi hametin relasaun bilateral no kooperasaun entre Timor Leste ho Indonezia. No Prezidente buka tenke implementa bainhira ba Jakarta ho Prezidente Republika Indonezia, Joko Widodo iha 2022.
“Ami koalia kedas atu aumenta relasaun NTT ho Timor Leste nia kooperasaun,” dehan Prezidente Republika Jose Ramos Horta.
Bainhira Prezidente Horta hasoru malu ho Prezidente Republika Indonezia, Joko Widodo, Joko propoin idea parke industrial ida iha Timor Leste besik fronteira no investidor sira husi Indonezia. No sira mos koalia ba malu kona-ba zona komersiu livre entre Rejiaun Administrativa Espesial Oekusi-Ambeno (RAEOA) ho NTT.
“Bainhira hau ba NTT hau sempre buka oinsa ita nia relasaun nee, tanba ita nia povu rihun ba rihun la hein governu, povu Timor kuaze 100 mil kada fulan atravesa fronteira ba NTT ho livre, tanba nee ita tenke hadia no hametin ita nia kooperasaun,” Katak Horta.
Bainhira Prezidente Republika Indonezia Joko Widodo dehan atu harii Universidade tekniku ida iha zona fronteira, tanba nee mak PR husu ba akademika UNTL nian atu tau hanoin hodi halo mudansa no husu governu atu apoiu harii Universidade tekniku ida iha zona fronteira nian.
Iha biban nee, Prezidente husu ba UNTL ho Universidade NTT mak tau ideia hamutuk hodi aprezenta ba projetu formal ida ba governu rua entre TL ho Indonezia atu nunee Timor tau fundus hira no mos Indonezia mos tau nia fundus hanesan atu harii Universidade ida iha fronteira ho kampus nee iha rai Timor Leste no mos rai vizinhu Indonezia. Bainhira Timor Leste ho Indonezia harii Universidade iha fronteira signifika nasaun rua nee iha nia atraksi international tanba nasaun Indonezia país ida neebe importante tebes atu nunee governu sentral bele apoiu no Governu TL mos bele apoiu malu hodi prepara joven sira ba futuru rai nee nian.
“Hau husu UNTL ho Universidade NTT atu diskute didiak planu prioridade atu harii Universidade iha fronteira nee, tanba edukasaun nee importante tebes. Tanba edukasaun agora sai dezafiu boot ba mundu,” dehan nia.
Prezidente hatete, oras nee daudaun sei hasoru dezafiu edukasaun iha mundu tanba nee Prezidente husu UNTL ho Universidade NTT atu halo diskusaun didiak nunee bele iha solusaun harii universidade iha Fronteira.
(eme)
