DILI, STLTIMORLESTE.com – Prezidente Republika (PR), Jose Ramos Horta kondekora Medalha Orden Timor Leste ba reprezentante internasional nain 2, Marc no Bernard nuudar rekonhesimentu ba sira nia servisu esepsional ba povu Timor nian no sira nia kontribuisaun ba dezenvolvimentu nasional.
Iha loron kuarta lokraik (11/06/2025) Prezidente Republika Jose Ramos Horta kondekora medalha Ordem Timor Leste ba Enkarregadu Negosiu Estadus Unidus Marc Weinstock no Reprezentante Banku Mundial iha Timor Leste Bernard Harbone iha Palasiu Prezidensial.
Prezidente kondekora Medalha Orden Timor Leste ba distintu reprezentante internasional nain rua nuudar rekonhesimentu ba sira nia servisu esepsional ba povu Timor nian no sira nia kontribuisaun ba dezenvolvimentu nasional. Resipiente neebe simu onra prestijiozu ida-nee mak Marc A. Weinstock, Enkarregadu Negosiu sira Embaixada EUA nian iha Timor-Leste no Bernard Harborne, Reprezentante Rezidente Banku Mundial nian iha Timor Leste
Enkarregadu Negosiu sira Estadus Unidus nian Marc A. Weinstock servisu nuudar Enkarregadu Negosiu Embaixada Estadus Unidus nian iha Dili dezde fulan Agostu 2023. Durante nia mandatu fulan 18 nia laran nia superviziona melhoria signifikativu sira iha koordenasaun misaun sira Estadus Unidus nian iha Korpu Pas, USAID, Millennium Challenge Corporation, no Naval EUA Seabees. Embaixada Estadu Unidus habelar informasaun ba munisipiu 13 hotu iha Timor Leste, hodi hametin ligasaun sira iha baze entre komunidade Amerikanu no Timoroan sira.
Weinstock hasae kooperasaun seguransa EUA-Timor Leste liu husi programa asistensia umanitaria, inisiativa seguransa maritima, melloria kritiku ba Aeroportu Baucau ho koordinasaun ho F-FDTL, no habelar atividade formasaun bilateral sira inklui Dalan ba Dame, CARAT, no liu envolvimentu dezena ida iha Programa Parseria Estadu nian ho Guarda Nasional Rhode Island.
Reprezentante Banku Mundial Bernard Harborne halao knaar nuudar Reprezentante Banku Mundial nian iha Timor Leste dezde fulan Agostu 2021, hodi apoia Governu nia esforsu rekuperasaun ekonomika pos-pandemia. Ninia mandatu foka ba diversifikasaun ekonomika, kriasaun empregu iha setor sira hanesan ekonomia azul, no responde ba nesesidade populasaun foin-sae Timor Leste nian, inklui esforsu hodi kombate stunting.
Harborne nia realizasaun importante sira inklui kolaborasaun ho Ministeriu Finansas kona-ba reforma fiskal no jestaun finansa publika sira, ajuda estabelese Forsa Tarefa Inter-Ministerial kona-ba Asuntu Sosial neebe foka ba nutrisaun no seguransa ai-han, no hametin diskursu publiku kona-ba elaborasaun politika bazeia ba evidensia. Ninia esperiensia klean ho Banku Mundial dezde 2004 inklui serbisu iha tranzisaun sira pos-konflitu nian iha nasaun oioin iha Afrika no Azia.
Prezidente Republika Jose Ramos Horta dehan, Servisu sira neebe halao husi Weinstock no Harborne ezemplu espiritu kooperasaun internasional neebe fundamental ba pas, estabilidade no dezenvolvimentu nasaun nian.
“Reprezentante Rezidente Banku Mundial iha Timor Leste, Sr. Bernard Harborne halao atividade sira neebe importante tebes hodi fo benefisiu ba ita-nia povu iha setor dezenvolvimentu nasional oin-oin durante nia karreira profisional. Servisu sira neebe halao husi Enkarregadu Negosiu Estadus Unidus Amerika nian, Sr. Marc A. Weinstock, fo ona benefisiu ba Timor-oan barak iha tinan hirak nia laran no merese hetan rekonesimentu no valorizasaun husi Estadu,” dehan PR Horta.
Aleinde nee Marc A. Weinstock sei kompleta nia knaar iha Timor Leste iha meadu iha fulan Junu tinan 2025 no asumi nia kargu tuir mai nuudar Visi Xefe Misaun ba Reinu Eswatini iha Afrika Sul. Sr. Bernard Harborne remata nia mandatu iha Timor-Leste iha final iha fulan-Junu tinan 2025 no sei halao nia knaar nuudar Reprezentante Banku Mundial nian ba ilha Salomão no Vanuatu.
(eme)
