AMBENO, STLTIMORLESTE.com – Prezidente Republika (PR), Jose Ramos Horta, ohin halao vizita trabalhu ba povu Oecusse, tanba nee Komando Polisia Nasional Timor Leste (PNTL), Rejiaun Administrativa Espesial Oecusse-Ambeno (RAEOA) preparadu ona atu asegura seguransa iha vizita nee.
Informasaun nee hatoo husi Komandante PNTL RAEOA, Superintendente Xefe Polisia, Nicolao Francelino da Costa ba STL iha serimonia pasa revista transporte polisia nian iha Komando PNTL RAEOA Santa Rosa Oecusse, Suku Costa, Postu Administrativu Pantemakassar RAEOA, Segunda (10/08/2026).
“Liga ho ita nia Prezidente Republika (PR), Jose Ramos Horta nuudar Xefe Estadu nomos nuudar Komandante Supremu Forsa Armada Timor Leste (TL) nian, PNTL RAEOA agora daudaun ami prepara ona ninia operasaun seguransa nian, para oinsa atu asegura seguransa diak liu tan ba ita nia vizita PR mai Oecusse iha loron Tersa (11/08/2026).
Nia dehan, daudaun nee hasai ona planu kolokasaun membru PNTL ba Xefe Estadu nia vizita ba povu Oecusse. Liga ba servisu guarda de ondra, ida nee husi forsa armada mos sei halo, tanba ida nee tuir lei neebe mak vigora, kualker entidade liu-liu PR ba fatin neebe deit, forsa armada mak sei halao guarda de ondra hodi simu segada husi PR mai Oecusse.
Iha fatin ketak, Xefe Gabinete Prezidente Autoridade RAEOA, Marito de Araujo dehan, liga ho vizita PR, Jose Ramos Horta, loraik nee Prezidente Autoridade Rejiaun Administrativa Espesial Oecusse-Ambeno, Regio da Cruz Salu, loraik nee halao enkontru preparasaun ho Sekretariu Rejional nain 3 ho Diretor Rejional inklui Parte seguransa husi Polisia no FALINTIL Forsa Defesa Timor Leste (F-FDTL), atu simu Xefe Estadu mai Oecusse.
“Ohin loraik nee, ita nia PA-RAEOA ho Sekretariu Rejional sira nomos Diretor Rejional sira inklui Komandante PNTL ho F-FDTL halao enkontru preparasaun atu sim Xefe Estadu neebe aban Tersa (11/08/2026), sei halao vizita trabalhu iha Oecusse.
Iha vizita trabalhu Xefe Estadu nian iha Oecusse neebe fo sai husi Assesor SSAS-PR, Quintiliano Moniz Carbalho katak, Xefe Estadu ho komitiva sai husi Dili ba vizita dahuluk ba komunidade sira iha suku Sanirin Postu Administrativu Balibo Munisipiu Bobonaro. Hafoin ida nee, kontinua oan kiak nain lima iha Balibo no viajen husi Balibo ba kedan Oecusse liu husi fronteira Motain ba Fronteira Sakato.
Iha lokraik, PR Horta ho Komitiva sei halao lansamentu fatuk dahuluk ba konstrusaun Edifisiu Media Oecusse Post, hafoin ida nee kontinua vizita Dapur ba povu iha Aldeia Oemolo, Suku Lifau.
Iha loron Kuarta (12/08/2026), PR Horta ho komitiva sei vizita Empreza Ocho Pari neebe hakiak animal, iha okaziaun nee sei distribui ba grupo kreativu sira, nunee iha lokraik Xefe Estadu ho komitiva sei fila ba Dili liu husi fronteira terestres.
Tuir observasaun STL iha Fronteira Sakato, Autoridade RAEOA ho parte seguransa husi PNTL no F-FDTL, Jestor Postu Administrativu Pantemamasaar, Nitibe, Oesilo no Pasabe, Xefe Suku no Lia nain husi Suku Nipane ho povu Oecusse, preparadu tiga ona hodi simu Xefe estadu Mai vizita povu Oecusse.
(jos)
