DILI, STLTIMORLESTE.com – Prezidente Republika (PR), Jose Ramos Horta halo enkontru ho Konselheiru Senior Direitus Umanus foun husi Gabinete Koordenador Rezidente ONU nian, Raja Azwa Petra, hodi diskute kona-ba integrasaun Direitus Humanus iha treinamentu militar.
Bainhira remata hasoru malu, Konselheiru Senior Direitus Umanus foun husi Gabinete Koordenador Rezidente ONU nian, Raja Azwa Petra ba jornalista sira iha Palasiu Prezidensial Nicolau Lobato, Bairo Pite, Tersa (05/05/2026) hatete, sente ondradu hodi mai hasoru malu ho Prezidente Republika Jose Ramos Horta iha palasiu, no enkontru nee foka integrasaun Direitus Humanus iha treinamentu militar.
Nia hatete,mai halao enkontru nee nuudar mos vizita kortejia hodi aprezenta aan ba Prezidente Republika no nia mos aprezenta aan katak nia mak nuudar xefe foun hosi Unidade Konsellu Direitus Umanus no hatoo informasaun ba Xefe Estadu kona-ba inisiativa sira Nasoens Unidas nian neebe lao hela hodi apoia promosaun no protesaun direitus umanus iha Timor laran tomak.
Durante audiensia nee, Raja Petra foka ba parseira Nasoens Unidas nian neebe kleur ona ho Provedoria Direitus Umanus no Justisa (PDHJ), liu-liu kona-ba treinamentu direitus umanus ba polísia no militar. Fokus prinsipal hosi diskusaun nee mak proposta atu institusionaliza treinamentu nee liu husi integra modulu direitus umanus nian ba kurríkulu permanente iha Akademia Polísia no Akademia Militar sira.
Enkontru nee mos aborda kona-ba Timor Leste nia kompromisu neebe boot ba Lei internasional, hodi nota katak nasaun nee sai parte ona ba tratadu internasional foun ualu hosi tratadu direitus umanus prinsipal sia.
“Apoia kontinuadu husi ONU ba governu iha ninia obrigasaun sira hodi relata tratadu sira-nee. Aleinde nee, sira mos esplora dalan foun ba koperasaun kona-ba Direitu ba Dezenvolvimentu”, foka liu-liu ba oinsa enkuadramentu nee bele halao iha kontestu ASEAN nian neebe Timor-Leste kontinua ninia integrasaun rejional,” dehan Raja Azwa Petra.
Iha hasoru malu nee Prezidente Republika Jose Ramos Horta antes halao enkontru kaer liman hatoo benvindo ba Konselheiru Senior Direitus Umanus foun hosi Gabinete Koordenador Rezidente ONU nian, Raja Azwa Petra neebe mai hasoru Xefe Estadu hodi deskute konaba integrasaun Direitus Humanus iha treinamentu militar.
(eme)
