DILI, STLTIMORLESTE.com – Prezidente Republika (PR), Jose Ramos Horta enkontru ho Primeiru Ministru Fiji, Sitiveni Rabuka, afirma fraternidade pasifiku no kooperasaun multilateral no estratejiku.
Reuniaun entre Prezidente Republika Jose Ramos Horta ho Primeiru-Ministru Fiji, Sitiveni Rabuka, halao iha Port Moresby. reuniaun bilateral neebe produtivu tebes ho Primeiru-Ministru Fiji nian, Sitiveni Rabuka, sorin sorin hosi Simeira Oseanu Melanezia nian iha Port Moresby.
Tuir komunikadu neebe STL asesu Kinta nee (14/05/2026) hatete, Reuniaun nee selebra ligasaun amizade neebe duravel no respeitu mutuu entre Estadu Illa Kiik sira iha Dezenvolvimentu (SIDS) rua nee.
Primeiru Ministru Rabuka foti sentimentu klean hosi “fraternidade Pasífiku” nian (Pacific brotherhood), hodi enfatiza katak relasaun entre Fiji, Timor-Leste, no rejiaun Pasífiku neebe luan liu harii iha eransa riku hosi solidariedade istorika no unidade rejional neebe estabelese hosi sira-nia lider fundador sira.
Hodi simu vizaun fraternidade rejional nee, Prezidente Ramos-Horta foti importansia ba nesesidade krítika atu transforma solidariedade istorika nee sai kooperasaun neebe konkreta no bele halao.
Xefe Estadu destaka katak servisu hamutuk mak esensial hodi hasoru dezafiu kontemporaneu sira neebe nasaun illa sira hasoru ohin loron, liuliu vulnerabilidade klimatika neebe makaas, seguransa ai-han, no inkluzaun ekonomika.
Lider nain-rua manifesta sira-nia vontade mutuu neebe forte atu klean liutan kooperasaun bilateral iha Indo-Pasífiku, hodi garante reziliensia ekonomika hamutuk no dezenvolvimentu sustentavel ba sira-nia povu.
Iha palku multilateral, reuniaun nee foka ba koordenasaun pozisaun diplomatika estratejika hodi hasae lian nasaun illa sira-nian iha Nasões Unidas.
Prezidente Ramos-Horta temi ninia karta ofisial foin lalais neebe haruka ba Prezidente Fiji nian, Ratu Naiqama Tawakecolati Lalabalavu, hodi defende reforma ONU nian neebe esensial. Kestaun neebe krusial mos, Prezidente husu ofisialmente apoiu hosi Fiji ba kandidatura Portugal nian ba Konsellu Seguransa ONU ba mandatu 2027–2028.
Dialogu nee konklui ho kompromisu unifikadu hodi dudu ba oin pas, reziliensia ambiental, no justisa global iha Pasífiku no ba oin.
(eme)
