DILI, STLTIMORLESTE.com – Prezidente Republika (PR), José Ramos-Horta simu vizita Ministru Saúde Indonezia diskute hamutuk kona-ba prioridade no dezafiu ne’ebé Diretor Jerál OMS tuir mai sei hasoru.
Iha loron Tersa (08/09/2026) Prezidente Repúblika Ramos-Horta, simu Ministru Saúde Repúblika Indonézia nian, Budi Gunadi Sadikin, ho nia komitiva iha Palásiu Prezidensiál Nicolau. Iha hasoru malu ne’e hodi halo enkontru ida-ne’e marka kompromisu ofisiál dahuluk entre Prezidente Ramos-Horta no Ministru Sadikin, ne’ebé hala’o durante vizita Ministru nian mai Timor-Leste ba sesaun ba dala 79 husi Komité Rejionál Sudeste Aziátiku OMS nian, ne’ebé mak realiza iha Dili husi loron 7 to’o loron 10 fulan-setembru tinan 2026.
Prezidente Ramos-Horta simu parabéns husi Ministru ba Timor-Leste nia susesu iha eliminasaun trakoma no nia integrasaun istóriku nu’udar membru ASEAN ba dala 11.
Prezidente espresa ninia apresiasaun ba realizasaun hirak-ne’e no konsidera hanesan afirmasaun ba progresu kontinuasaun nasaun nian.
Prezidente Ramos-Horta rekoñese Ministru nia preokupasaun kona-ba asuntu virus rabies no subliña kompromisu forte Timor-Leste nian ba kolaborasaun transfronteira.
Prezidente subliña katak Timor-Leste konsidera ameasa ida-ne’e ho sériu no prontu atu serbisu besik ho Indonézia kona-ba hasa’e vijilánsia no kampaña vasinasaun ba animál sira ne’ebé koordenadu.
Prezidente salienta katak atu proteje illa husi vírus rabies presiza responsabilidade no asaun hamutuk entre nasaun rua.
Diskusaun ne’e mós koalia kona-ba ba eleisaun ne’ebé sei mai ba Diretór-Jerál Organizasaun Mundiál Saúde nian, ne’ebé marka ona ba Asembleia Mundiál Saúde nian ba dala 80 iha fulan Maiu tinan 2027. Ministru Sadikin, nu’udar kandidatu ida husi kandidatu sira seluk ho konkorente sira husi Arábia Saudita, Qatar, no Béljika, husu matadalan no konsellu husi Prezidente Republika, ho rekoñesementu ba Prezidente nia esperiénsia lubun boot ho sistema Nasoins Unidas nian.
Prezidente Ramos-Horta rekoñese Ministru nia kandidatura no partila nia hanoin kona-ba prioridade no dezafiu sira ne’ebé Diretór-Jerál OMS tuirmai sei hasoru, partikularmente iha navegasaun ba paizajen jeopolítika atuál.
Prezidente subliña nesesidade ba lideransa foun atu hametin kooperasaun internasionál iha dezenvolvimentu sistema saúde, kobertura saúde universál, seguransa saúde, no kapasitasaun.
Timor-Leste konsidera didi’ak kandidatu sira hotu, ho foku atu avansa área krítiku sira-ne’e iha kooperasaun saúde globál nian.
(eme)
