DILI, STLTIMORLESTE.com – Prezidente Republika (PR), Jose Ramos Horta sujere atu fo pena todan ba ema neebe involve aan iha falsifika osan falsu.
Prezidente Republika Jose Ramos Horta hatoo kestaun nee ba jornalista sira, bainhira remata halo Zoom Meting iha Palasiu Prezidensial Nicolau Lobato, Bairo Pite, Kuarta (15/04/2026).
PR husu atu fo sansaun todan ba ema neebe falsifika osan.
Iha biban nee Prezidente Republika fo parabens ba Ekipa Diresaun Servisu Investigasaun Kriminal Husi Polisia Nasional Timor Leste (PNTL) neebe mak ezekuta mandadu Buska husi Ministeriu Publiku ba armajen Y&W iha bidau hodi hetan osan falsu ho montante milhaun haat resin dolar amerikanu.
“Uluk fo parabens ba PNTL neebe mak detekta ida nee, hau mos foin haree iha media nee laos premeiru vez akontese, maibe akontese dala hira ona no dala barak falsifikasaun osan akontese barak iha mundu, no Indonezia. Ita laiha meius iha Timor para halo osan falsu nee ho kualidade, o lori ba banku haree kedas osan nee falsu ka lae,” dehan Prezidente Republika.
Prezidente Republika Jose Ramos Horta husu ministeriu relevante tenke haree didiak ema neebe falsifika osan hodi fo pena todan ba sira.
“Tenke haree didiak mai husi neebe, kumpre sira husi rai laran fo kadeia todan ba sira punisaun makaas ba kompanha neebe involvidu direitu ou indireita tenke hetan punisaun no lalais labele fo rezidensia fiksu ba sira tenke tama bekora, Ema estranjeiru karik rezidensia fiksu nee sira bele halai , tanba nee polisia tenke rigorozu labele mamar,” katak PR Horta.
Xefe Estadu hatete, ida nee hola parte hanesan krime organizadu, maibe hanesan baibain Prezidente hatete Timor laiha krime organizadu, Timor nia iha rai laran ema neebe sutisifikadu liu mai husi liur no osan falsu nee mai husi liur laos produsaun ho makina iha rai laran.
“Banku sira esperiensia boot la konsege bosok banku sira o lori osan nee banku, Banku Mandiri BNU sira hotu-hotu haree kedas katak osan nee falsu, nee duni se laos sufistikadu nee fasil detekta,” Katak Horta.
Iha loron kuarta (15/04) Ekipa Diresaun Servisu Investigasaun Kriminal husi PNTL neebe mak ezekuta mandadu buska husi Ministeriu Publiku ba armajen Y&W iha bidau hodi hetan osan falsu ho montante milhaun haat resin dolar amerikanu.
Mandadu Ministeriu Publiku nia ho numeru uniku krime (Nuc) 0138/26- PNSIC do forsa legal atuasaun Diresaun Servisu Investigasaun Kriminal husi PNTL hodi detekta duni osan falsu milhaun haat resin hatama iha books neebe tau iha kaixa laran ho brankas lima.
(eme)
