DILI, STLTIMORLESTE.com – Prezidente Republika (PR), Jose Ramos Horta vizita edifisiu Sentral Komisaun Funsaun Publiku (KFP), hodi avalia progresu husi reforma administrasaun nasaun nia.
Durante vizita nee Prezidente defende profisionalizmu no sustentabilidade iha vizita ofisial ba edifisiu Komisaun Funsaun Publika nian, hodi rona direita progresu no dezafiu neebe funsionariu sira hasoru.
Iha vizita nee Prezidente fo louvor ba komisaun tanba implementa sistema dijital modernu no ezame bazeadu ba meritu neebe dezena hodi garante imparsialidade no integridade iha rekrutamentu no haktuir katak tranzisaun ba teknolojia mak pasu vital ida hodi harii governu neebe transparente liutan hodi serví sidadaun Timor-Leste ho efektivu.
Maske rekonhese avansu sira nee, Xefe Estadu foti kestaun krítiku kona-ba sustentabilidade tempu naruk nian husi numeru funsionariu publiku sira neebe boot relasiona ho PIB no orsamentu nasaun nian.
Prezidente husu atu iha jestaun funsaun publika neebe prudente no la partidaria iha jestaun ba Funsaun Publika, hodi enfatiza katak profisionalizasaun mak tenki sai prioridade.
Prezidente mos foti kestaun kona-ba nesesidade atu rasionaliza Institutu Publiku sira hodi evita sobrepozisaun (overlap) no garante katak funsaun hotu iha sektor publiku kontribui signifikativamente ba produtividade nasional.
“Enkoroja funsionariu publiku sira atu mantein padraun disiplina no etika neebe aas, no mos defende oportunidade serví nian iha rai-liur ba traballador Timor-oan sira,” dehan Prezidente liu husi diskursu iha salaun KFP Kaikoli, Tersa (05/05/2026).
Vizita nee reafirma Prezidensia nia kompromisu ba administrasun publika ida neebe kbiit-loos, kualifikadu liutan, no profisional tebes.
Nunee mos Prezidente Komisaun Funsaun Publika, Agostinho Letencio de Deus liu husi diskursu hatoo Benvindu ba Prezidente Republika neebe pela primeira vez vizita ofisial iha Komisaun Funsaun Publika.
“Permite ami atu ohin ami hatoo deit ba Nai Prezidente, maibe ami husu mos atu koalia mos ba funsionariu publiku iha territoriu tomak, tanba aproveita momentu neebe iha live Mensajen Sua Exelensia nian laos deit ba ami, maibe ba funsionariu tomak. Aproveita mos momentu ida nee, ohin 5 de Maiu koinsidente ho loron istoriku tanba nee mak foto sira neebe mak ami tau iha oin hahu kedas ho sua exelensia Prezidente momentu sei joven organiza funu no mos simu nobel husi nobel nee mak marka istoria ba ita nia independensia mos no foto ida terseiru hodi ohin ita selebra nuudar prezidente republika,” dehan PR KFP.
Iha biban nee Prezidente KFP hatoo progresu no dezafiu sira neebe mak durante nee Komisariu no funsionariu sira enfrenta durante sira-nia karreira.
“Atu kontinua tuir mai ami hakarak hatoo deit progresu sira neebe halao ona durante ami nia mandatu hakarak hatoo ba sua exelensia katak depois de 4 mandatu ami nain hira nee bolu mai ona 4 mandatu iha primeiru mandatu mak Enjeneiru Liboriu 2 no 3 mandatu mak profesor Dr. Faustino ami 4 mandatu. Iha 4 mandatu ami defini progarama prinsipal lubuk ida mak neebe mak primeiru atu alina ho oinsa mak funsionariu sira bele involve aan iha organizasaun internasional sira iha CPLP ita asean ita mos ohin loron ita influensia de globalizasaun AI no mos organizasaun sira seluk neebe mak funsionariu publiku tenke involve mos ami nia programa ida nee mos atu alina ho programa IX Governu Konstitusional liu-liu iha programa reforma da administrasaun publika,” katak nia.
Terseiru Programa neebe maka halao, atu mos bele alina ho preparasaun futuru lideransa ba funsionariu sira, atu bele asume responsabilidade iha kargu no instituisaun estadu sira. Husi programa ida nee, hahu iha 2024 hahu ho diagnostiku kiik ida atu bele hatene deit agora nee iha neebe. Husi diagnostiku ida-nee, ikusmai nota iha situasaun lubuk ida neebe maka ohin hakarak hatoo ba Prezidente.
(eme)
