DILI, STLTIMORLESTE.com – Prezidente Republika (PR), Jose Ramos Horta halo vizita ida ba Eskola Teknika Vokasional Don Bosco Maumali iha Maliana, hodi haree diretamente progresu no kontribuisaun eskola nee nian iha dezenvolvimentu edukasaun teknika iha Timor Leste.
Iha nia deskursu, iha Maliana Kuarta (07/04/2026) Prezidente Ramos Horta hateten, katak nia sei fasilita oportunidade ba estudante sira atu estuda iha Amsterdam-Holanda, inklui proposta inicial ba estudante nain 6 (mane 3 no feto 3) husi eskola refere, posibilidae sei ba tuir bolsa estudu hamutuk estudante nain 30 seluk hodi bele eskola iha rai liur.
“Ohin hau mai iha nee Se Padre sira bele hili Estudante sira, ita hahu ho estudante nain 6 (feto nain 3 no mane nain 3) atu bele estuda iha Akademia ida iha Amsterdam Holanda, hau sei konfirma didiak lai iha Nivel saida, estudante neebe remata ona iha Decimo ano no tenke Koalia lian Ingles, se lakoalia lian Inglês bele tuir Kursu iha Dili, hau bele selu imi nia kurau lian Inglês nian” Hateten Prezidente iha nia enkontru ho estudante sira.
Prezidente enkoraja estudante sira atu dedika sira nia an no foka iha area estratejika hanesan Siensia, Teknolojia, Medicina, Finansas no Artifisial intelijensia, hodi responde ba dezafiu global no mudansa desenvolvimentu ohin loron nian.
Nunee mos Diretor E.T.V Don Bosco Maumali, Irmaun Marçal Amaral, SDB, hatete katak estabelesimentu eskola nee mai husi inisiativa Prezidente Ramos-Horta rasik iha nia mandatu primeiru momentu neeba. Prezidente husu apoiu ba Governu Spaina atu kontribui iha edukasaun Timor-Leste. Tuir kooperasaun entre Governu no Kongregasaun Salesiana, eskola nee estabelese ofisialmente tuir akordu iha loron 10 Marsu 2010 no hahu atividade Akademia iha 7 Janeiru 2014 ho estudante primeiru nain 30 neebe aprende iha iha area eletrisidade.
Desde eskola nee hatudu progresu signifikativu, ho total graduadu hamutuk 247 husi tinan 2016 – 2024 no pursentu 57,9% sira hetan ona servisu. Iha tinan 2024, IX Governu liu husi Ministeriu Edukasaun aprova tan departamentu foun Jestaun Teknika Informatika, ho total estudante husi Departamentu rua nee agora hamutuk nain 164.
Eskola mos oferese internatu ba estudante sira husi munisípiu hotu no implementa programa sosial “Involvimentu iha Komunitariu”, neebe estudante sira fo servisu voluntariu hadia instalasaun eletrisidade iha komunidade sira ho gratuitamente.
Maske nunee, diretor eskola hatete katak dezafiu importante sei iha, liu-liu preparasaun akademika estudante sira husi nivel baziku no menus iha rekursu ekipamentu. Maibe Eskola kontinua investe nafatin iha kapasitasaun profesor sira nian, liu husi fo formasaun iha UNTL.
Iha okaziaun nee, Prezidente Ramos-Horta entrega mos fasilidade desportu ba eskola refere no husi parte eskola entrega prezente simboliku hanesan estatua “Maria Auxiliadora dos Cristãos” nuudar símbolu fiar no edukasaun.
Vizita nee reafirma komprimisu Estadu nian atu promove edukasaun vokasional nuudar motor fundamental ba dezenvolvimentu rekursu umanu iha Timor Leste.
(eme)
