DILI, STLTIMORLESTE.com – Prezidente Republika (PR), José Ramos Horta halo vizita ofisial ba nasaun Bulgaria no vizita trabalhu ba nasaun Reinu Unidu.
Iha Loron Domingu (20/04/2025) Prezidente hanesan mos Laureadu Nobel ba Pas, Jose Ramos Horta hahu vizita ofisial ba Republika Bulgaria husi loron 20-23 Abril tinan 2025, tuir fali ho vizita trabalhu ba Reinu Unidu husi loron 20-23 Abril tinan 2025.
Durante vizita ofisial ba Bulgaria, Prezidente Ramos Horta sei hasoru malu ho Prezidente Republika Bulgaria nian, S.E. Rumen Radev, ba diskusaun bilateral foka ba hametin relasaun diplomatika no esplora area foun kooperasaun nian entre nasaun rua nee.
Prezidente mos sei halao sorumutu ho Primeiru Ministru Bulgaria, S.E. Rossen Jeliazkov, no Ministru Negosiu Estranjeiru, S. E. Georg Georgiev.
Destake programa iha Bulgaria maka Prezidente Ramos Horta nia palestra iha Institutu Diplomatiku kona-ba “Timor Leste Husi Konflitu ba Pas, Seguransa, no Integrasaun Rejional,” hodi fahe Timor Leste nia viajen notavel ho komunidade diplomatiku iha Sofia. Prezidente mos sei vizita fatin kultural importante sira inklui Igreja istoriku Boyana no Muzeu Istoria Nasional.
Iha loron 23 Abril, Prezidente Ramos Horta sei husik Bulgaria hodi halao nia vizita traballu ba Reinu Unidu. Iha Reinu Unidu, Prezidente sei realiza serie enkontru nivel-aas ho ofisial no instituisaun Britaniku sira.
Iha loron 24 fulan-abríl, Prezidente Ramos Horta sei partisipa iha enkontru bilateral iha Gabinete Negosiu Estranjeiru, Commonwealth no Dezenvolvimentu nian, tuir ho diskusaun ho Prezidente Kamara Komun, Sir Lindsay Hoyle, iha Uma Parlamentu. Prezidente mos sei hasoru malu ho Sunda Energy no ninia investidor sira hodi diskute sira nia operasaun atual kona-ba rekursu gas boot iha tasi Timor Leste nian no sira nia oportunidade foku ba kadoras gas nian iha Sudeste Aziatiku.
Iha parte Tarde iha loron nee, Prezidente Ramos Horta sei hato’o diskursu prinsipal tuir ho sesaun pergunta no resposta iha Eton College, instituisaun edukasional ida neebe prestijiozu liu iha Reinu Unidu ho legadu eduka realeza no figura publika notavel sira. Sorumutu nee sei remata ho jantar gala.
Iha 25 Abril, Prezidente sei koalia iha forum iha London Business School neebe rekonesidu, neebe sei partisipa husi CEO, bankariu, investidor, no diplomata sira.
Prezidente Ramos mos sei hasoru malu ho Ministru Estadu ba Indo-Pasífiku, Catherine West, no Prezidente Ezekutivu husi Institutu Internasional Estudu Estratéjiku (ISS), Sir John Chipman.
Iha parte tarde iha loron nee, Prezidente sei halao konversasaun importante ho Komite ASEAN Londres no reprezentante sira husi Gabinete Negosiu Estranjeiru, Commonwealth no Dezenvolvimentu iha Embaixada Indonezia, iha neebe prezidente komite (Indonézia) sei fo oportunidade atu diskute Timor Leste nia adezaun ba ASEAN.
“Vizita sira ba Bulgária no Reinu Unidu reprezenta pasu signifikativu iha hametin Timor Leste nia relasaun bilateral no avansa ita-nia nasaun nia interese iha palku global,” dehan PR Horta.
PR dehan, Bulgaria sai ona apoiante ida neebe metin iha jornada dezenvolvimentu Timor Leste nian, no TL hakarak habelar liutan kooperasaun iha area sira neebe fo benefísiu ba malu.
“Hanesan mos ita nia relasaun ho Reinu Unidu kontinua lao iha diresaun dalan neebe pozitivu, partikularmente iha investimentu, edukasaun, no asuntu seguransa rejional. Hau hein atu iha diskusaun produtivu kona-ba hasae kooperasaun iha area sira neebe iha interese ba malu, partilla Timor Leste nia viajen notavel husi konflitu ba pas, no esplora dalan foun ba interkambiu ekonomiku no kulturál.” Katak PR Horta.
Prezidente nia vizita traballu ba Reinu Unidu sei remata ho sorumutu ho vibrante komunidade Timorense neebe hela iha Reinu Unidu, neebe sira-nia remesa no kontribuisaun sira apoia signifikante ba dezenvolvimentu Timor Leste nian no hatudu reziliensia no determinasaun husi povu Timor Leste.
Prezidente Ramos Horta tuir planu sei fila mai Dili, Timor Leste, iha loron 28 fulan Abril 2025.
(eme)
