DILI, STLTIMORLESTE.com – Prezidente Republika (PR), Jose Ramos Horta vizita povu Munisipiu Baukau no Vikeke ho objetivu atu reforsa solidariedade sosial no inkluzaun ba grupu vulnerável sira.
Prezidente Republika, Jose Ramos Horta hahu vizita komunitaria ida ba Munisipiu Baukau no Vikeke durante loron tolu husi Sabadu (18–20 Abril 2026), ho objetivu atu reforsa Solidariedade Sosial, promove inkluzaun ba grupu vulneravel sira no observa direta komunidade sira nia Kondisaun moris iha area rural.
Loron dahuluk Sabadu 18 Abril, Prezidente sei too iha Aldeia Luliheni, Suku Bucoli, Munisípiu Baukau, neebe simu husi autoridade munisipal no komunidade sira.
Prezidente sei halo lansamentu fatuk dahuluk ba konstrusaun uma dignu ida ba inan faluk Maria da Costa, neebe durante tinan barak hela iha ”Fatuk Kuak”. Hafoin remata lansamentu nee, Ekipa Unidade Sossiedade Sivil no Asuntu Sosial (SSAS) Prezidensia Republika sei distribui apoiu nesesidade bazika ba família hamutuk 47, liu-liu ba ema ho defisiensia no família kbiit-natoon.
Iha parte loraik, Prezidente vizita Orfanatu “Uma Esperansa” iha Vila Nova, Baucau, hodi observa direta kondisaun moris labarik sira nian, entrega material konstrusaun no apoiu nesesidade bazika ba orfanatu refere.
Vizita kontinua ba Venilale, neebe Prezidente mos halo lansamentu fatuk dahuluk ba uma ida ba sidadaun ho defisiensia iha area Lia-Oli, akompanha ho distribuisaun nesesidade bazika ba komunidade sira.
Loron daruak (19 Abril), Iha Vikeke Prezidente hahu vizita ida ba Gruta Nossa Senhora do Rosario de Fatima durante minutun balun iha Caraubalu. Tuir mai, Prezidente akompanha ho membru Governu balun too iha Beaço, hodi halo lansamentu programa agríkola “Kuda Hare” ba Natar foun no distribui apoiu ba komunidade sira. Viagem kontinua ba Suku Macadique, hodi hasoru malu ho komunidade sira, distribui mos nesesidade bazika no material desportu ba joven sira.
Iha loron hanesan, Prezidente Republika kontinua ba Postu Administrativu Uatucarbau, neebe simu husi komunidade sira iha Suku Irabin de Cima. Iha neeba, atividade sosial hanesan distribuisaun apoiu Nesesidade bazika no realiza mos atividade “camping” no jantar hamutuk ho komunidade iha area Irabere, hodi hametin relasaun entre lideransa no povu.
Iha loron ikus (20 Abril), Prezidente vizita fatin turizmu Bee-Tudak Irabere hodi observa potensialidade dezenvolvimentu turizmu lokal. Hafoin nee, Prezidente ho komitiva desloka ba Uatucarbau Villa, hodi entrega material konstrusaun ba uma dignu ba ema ho defisiensia no kontinua distribuisaun nesesidade bazika ba komunidade sira.
Vizita komunitaria nee reflete kompromisu Prezidente Republika atu kontinua hakbesik an ba povu, responde direta ba nesesidade komunidade no promove Polítika inkluzivu neebe fo prioridade ba ema Ho nesesidade Espesial no kbiit natoon sira.
Ikus liu, Prezidente Republika ho komitiva fila hikas ba Díli hafoin remata programa vizita iha munisípiu rua nee.
(eme)
