DILI, STLTIMORLESTE.com – Prezidente Republika (PR), Jose Ramos Horta husu Embaixador Boa Vontade ba meiu ambiente no rekursu bee, atu kontinua halao servisu ho profisional no kontinua halo ligasaun diak ho parte hotu.
Lia hirak nee hatoo husi Embaixador Boa Vontade no Enviado Especial do Presidente República para a cultura o ambiente e os recursos Hidricos, Ego Lemos ba jornalista sira, bainhira remata halao enkontru ho Prezidente Republika, Jose Ramos Horta iha Palasiu Prezidensial, Nicolau Lobato, Bairo Pite, Dili, Segunda (10/03/2025).
Ego Lemos dehan, ohin mai hasoru Prezidente Republika hodi informa hela katak, iha tempu besik nia sei viajen ba iha Japaun, tanba hetan konvite husi institutu peskizador husi Japaun no sei halo atividade lubuk ida, tanba nee antes viajen mai informa hela ba Xefe Estadu.
Nia hatete, durante viajen ba iha Japaun sei iha atividade oin-oin neebe nia halo, aleinde nee hatoo mos diskursu kona-ba kultura no ambiente iha University Tokyo.
Ego Lemos hatutan, iha hasoru malu nee Prezidente Republika, Jose Ramos Horta husu Ego Lemos atu kontinua halao atividade ho diak durante misaun nasaun nia, husu nafatin halo ligasaun diak ho parte hotu.
“Prezidente Republika fo deit parabens husu para kontinua halao misaun nasaun hodi bele halo ligasaun diak tan ho parte hotu, liu-liu espesialmente ba vizita espesial neebe hau sei viajen ba Japaun hahu loron 16 fulan Marsu no hau sei fila fali iha dia 2 Maiu,” dehan Ego Lemos.
Nia dehan, nia viajen ba Japaun iha loron 16 fulan Marsu tinan 2025, no sei fila hikas mai iha Timor Leste iha Loron 2 Maiu tinan nee.
(eme)
