DILI, STLTIMORLESTE.com – Prezidente Republika (PR), Jose Ramos Horta oferese ou apoiu parcel natal domin ba dadur sira iha Prizaun Gleno, nuudar domin husi aman nasaun ba nia povu.
Prezidente Republika Jose Ramos Horta apoiu parcel Natal ba família prizioneiru sira iha Postu Administrativu Gleno, Munisípiu Ermera. Iha jestu solidariedade, Prezidensia Republika estende ninia inisiativa anuál “Natal do Povo” (Natal Povu nian) ba Prizaun Gleno iha Munisípiu Ermera, hodi fahe pakote natal nian ba dadur nain 150.
Tuir Komunikadu neebe STL asesu husi media PR Tersa (17/12/ 2024) hatete, distribuisaun nee lidera husi Aida Maria dos Santos, Diretora Jeral Administrasaun Prezidensia Republika, akompanha husi kargu xave sira seluk husi ekipa prezidensial. Programa Natal do povo tinan ida neebe inisia husi Prezidente Ramos-Horta, hetan apoiu husi Primeiru-Ministru liu husi Visi Primeiru-Ministru, Francisco Kalbuadi Lay.
Iha biban nee, Diretora-Jeral, sublina importansia atu mantein fiar, esperansa, no domin durante tempu dezafiante sira iha moris, partikularmente durante epoka Natal nian.
Nunee mos Asesor Sosiedade Sivíl no Apoiu Sosial (SSAS-PR) Quintiliano Moníz, dehan, apoiu parcel Natal ba família prizioneiru sira iha Postu administrativu Gleno, Munisípiu Ermera.
“Programa ida nee, ami hodi hakat too mai iha prizaun Gleno nee, programa ida Natal do Povu, maibe laos Natal hamutuk deit ho sira iha liur, maibe halo ho maluk sira neebe maka iha fatin kloot, tanba nee ami lori hela prezente Natal nian ba ita boot sira,” dehan Assessor Quintiliano.
Nia dehan, inisiativa ida nee mai husi xefe estadu, Jose Ramos Horta ho Primeiru Ministru, Kay Rala Xanana Gusmão no vise Primeiru Ministru, Francisco Kalbuadi Lay nian. Ekipa sira nee hanesan liman ain sira, hodi mai entrega ba maluk prizioneiru sira.
Objetivu loloos ba programa ida Natal hamutuk ho povu maka atividade ida asaun karitativa, atividade ida maka feira no inklui atividade kompetisaun prezepiu.
Nunee mos Diretor estabelesementu Prizaun Gleno, Cristiano Salsinha, agradese wain ba programa husi Prezidente Republika nian, hodi mai too iha prizaun Gleno. Tinan-tinan xefe estada la haluha komunidade neebe maka hela iha prizaun Gleno.
“ Ida nee ami fo agradese boot tebes-tebes, tanba Prezidente Republika la haree ba ema sira iha liur deit, sei hanoin mos ema sira neebe maka hasoru justisa hela iha fatin ida nee,” katak nian.
Enkuantu, parcel Natal nee, kompostu husi sasan nesesidade bazika maka hanesan, rinso, Sabaun, pepsodente, ropa labarik no ema boot nian no inklui sasan sira seluk-seluk tan Enkuantu tuir dadus husi prizaun Gleno, total prizioneiru iha prizaun Gleno hamutuk 101, feto-18 no mane 83.
(eme)
