DILI, STLTIMORLESTE.com – Primeiru Ministru (PM), Kay Rala Xanana Gusmão halo enkontru ho Prezidente Republika (PR), Jose Ramos Horta, hodi koalia kona situasaun rai laran, no komemorasaun 28 Novembru neebe sei komemora iha Rejiaun Administrativu Espesial Oekusi (RAEOA).
Primeiru Ministru Kay Rala Xanana Gusmão hatoo kestaun nee ba jornalista sira bainhira remata halo enkontru semanal ho Prezidente Republika Jose Ramos Horta, iha Palasiu Prezidensial Bairo Pite, Kinta (14/11/2024).
Primeiru Ministru hatete, durante semana hirak nee PM ho PR la halo enkontru, tanba PM ba Nova Yorke mai fali depois ba fali Portugal no Prezidente mos okupadu, tanba nee mak ohin lider nain rua hasoru malu, hodi koalia situasaun rai laran, no agora PM tenke ba fali Parlamentu Nasional, tanba sei halo diskusaun Orsamentu Jeral Estadu ba tinan 2025.
“Koalia buat balun koalia kona-ba situasaun, Prezidente kontente nafatin tanba arte marsiais bele responde ho diak, nia husu dehan tau nafatin ulun ba, labele kria problema tanba rai presiza pas,” katak PM.
Iha biban nee PM hatete, iha selebrasaun 28 Novembru sei komemora iha RAEOA, no oras nee dadaun iha hela preparasaun nia laran.
“Ami koalia oituan kona-ba iha Dezembru nee Prezidente atu sai no hau mos atu sai. Neebe hau labele temi agora, tanba 28 Novembru sei halo iha Oekusi nomos sei prepara hela, mais se mak atu mai no se mak atu mai depois mak sei fo hatene,” katak nia.
Primeiru Ministru hatete, foin loron 14 Novembru sei hela tan loron 14 mak foin selebra 28 Novembru, no eventu nee sei selebra iha Oekusi.
Nunee mos Prezidente Republika Jose Ramos Horta hatete, kona-ba konvite ba bainaka atu partisipa iha selebrasaun loron 28 Novembru, PR rasik konvite ona Prezidente Indonezia Prabowo, maibe sei hein konfirmasaun.
(eme)
