DILI, STLTIMORLESTE.com – Prezidente Republika (PR), Jose Ramos Horta ho Primeiru Ministru (PM), Kay Rala Xanana Gusmão hatoo votus Natal kmanek ba povu iha Timor Leste.
Prezidente Republika Jose Ramos Horta hatoo votus Natal kmanek nee ba jornalista sira, bainhira remata halo enkontru semanal ho Primeiru Ministru Kay Rala Xanana Gusmão iha Palasiu Prezidensial Bairo Pite, Kinta (19/12/2024).
“Dala ida tan hau hamutuk ho Primeiru Ministru, ami nuudar orgaun estadu nia lider nasionais hakarak hatoo ami nia votus Natal kmanek ba familia hotu-hotu iha TL, familia Timoroan sira neebe iha liur, iha tasi balun neebe buka moris iha rai seluk ou estuda buka vida, no moras sira iha Hospital, sira iha prizaun iha neebe deit ami nain rua haruka votus Natal kmanek tinan foun sei diak liu tan iha 2025,” katak Horta.
Nia hatete, PR ho PM hakuak boot ba povu tomak iha TL, liu-liu ba joven no alin sira, ferik katuas, kiik oan sira hotu.
Iha biban nee, Primeiru Ministru Kay Rala Xanana Gusmão mos hatoo dezeju Natal kmanek ba povu tomak iha Timor Leste.
“Dezeju Natal kmanek ba povu tomak, liu-liu ba joven sira no tinan foun neebe bele fo tempu no obrigasaun ba instituisaun estadu sira kumpri hodi bele hadia povu nia moris no lori rai nee ba oin,” katak Xanana.
Primeiru Ministru husu joven sira hotu katak, iha tinan kotuk hotu-hotu kontente, tanba iha periodu Natal la akontese buat ida too fim do ano la akontese buat ida.
Ho ida nee mak nuudar Primeiru Ministru nomos Prezidente Republika nia naran fiar tebes katak, joven sira iha bairu bairu kaer tuir mensajen Amu Papa neebe foin daudaun mai, neebe imi rasik mak hatudu ba mundu katak pas no estabilidade iha imi nia liman no iha imi nia ulun, iha imi nia hahalok rasik. Papa too tiha Vatikanu ba vizita rai seluk temi TL, nia kontente ho joven sira iha Merkadu Laran CCD, kontente tanba la akontese buat ida.
Primeiru Ministru apelu ba joven hotu-hotu iha Timor laran tomak, liu-liu iha Dili hadomi malu, kaer metin nasaun nia orgulhu neebe Papa rasik mak fo ezemplu bainhira ba vizita fatin seluk.
Nia hatutan, iha Portugal tinan nee selebra loron juventude, tinan mai nee sei selebra iha Korea, Papa Francisco sei ba, no joven husi Timor mos sei ba, tanba nee PM husu buka hametin nafatin mundu ninia konhesimentu kona-ba Timor, rai ida neebe sei iha problema barak duni mais joven sira kaer metin pas no estabilidade no harmonia.
(eme)
