BAUKAU, STLTIMORLESTE.com – Fatin hakmatek Pradet Baukau apoiu fundus ba benefisiariu nain 20 neebe identifika nuudar vitima Violensia Bazeia ba Jeneru (VBJ).
Koordenadora Pradet Baukau, Joana da Costa esplika, benefisiu nain 20 refere Pradet Baukau identifika liu husi dokumentus detalhadu liga ba nesesidade no rendimentu kada benefisiariu no nota benefisiariu hirak nee enfrenta problema ekonomia familia neebe kauza husi Violensia Bazeia ba Jeneru.
“Ami nia apoiu nee ba kada pesoal ho kustu US$ 350.00 neebe ami oferese tipu negosiu tolu ba sira analiza no identifika depois sira deside foti tipu negosiu,” hateten Joana ba jornalista sira iha Tirilolo Buakau, Tersa (03/06/2025).
Nia sunlina, tipu negosiu neebe Pradet Baukau prepara mak hanesan halo negosiu kios, hortikultura no faan roupa, maibe kada benefisiariu sei hetan apoiu fundu US$ 350.00 hodi utiliza ba negosiu ho objetivu atu hadia ekonomia familia.
Koordenadora nee iha esperansa ba apoiu refere, sei muda benefisiariu sira nia moris bainhira utiliza ho responsabilidade, tanba benefisiariu neebe antes hetan ona apoiu halao negosiu hahu iha mundana ekonomia familia.
“Ita husu para atu utiliza fundu nee oferese ba sira tenke iha komitmentu ida katak la fasil hetan oportunidade hanesan nee, tenke sai exemplar ba maluk seluk atu loke espasu para sira bele hetan oportunidade neebe hanesan,” Joana rekomenda.
Sekretaria Munisipal Asuntu Sosial, Maria Celestina Viegas enkoraja benefisiariu sira atu utiliza fundu refere ho responsabilidade nunee fo benefisiu ba nesesidade familia liu liu sustenta oan sira asesu edukasaun.
“Fila ba uma uza ho responsabilidade orsamentu neebe iha atu nunee iha funan sustenta ekonomia uma laran liu liu haree oan nia futuru, ita nia oan presiza eskola, futuru sira mak sei sai rekursu neebe diak,” Maria rekomenda.
Benefisiaria Umbelina Soares agradese ba apoiu tomak no promete sei utiliza fundus refere halo negosiu hodi sustenta ekonomia uma laran.
“Hau sente kontente no agradese, prezisa duni apoiu nee atu halo tempe hodi faan iha merkadu atu sustenta ekonomia familia,” Umbelina esperesa.
Entretantu benefisiariu nain 20 refere kompostu Munisipiu Vikeke nain tolu, Lautem ida no restu husi Munisipiu Baukau no fundus ba apoiu husi Uniaun Europeia.
(tom)
